गोकुळाष्टमीला श्री विठ्ठलाचे सुवर्ण अलंकारांनी मनोहारी रूप; दर्शनासाठी भाविकांची मोठी गर्दी

पंढरपूर / संतोष रणदिवे : गोकुळाष्टमी उत्सवानिमित्त पंढरपूर येथील श्री विठ्ठल-रुक्मिणी मंदिरात श्री विठ्ठलाला आकर्षक व पारंपरिक सुवर्ण अलंकारांनी सजविण्यात आले. विविध मौल्यवान अलंकारांनी नटलेले श्री विठ्ठलाचे विलोभनीय रूप पाहण्यासाठी मंदिरात भाविकांची मोठी गर्दी होत आहे.

गोकुळाष्टमीच्या पावन पर्वानिमित्त श्री विठ्ठलाला सोन्याचा मुकुट, कौस्तुभ मणी, दंडपेठ्या जोड मोठा, हिऱ्याची कंगनजोड, दहा लोकांचा शिरपेच, मोत्याचा तुरा, नाम निळाचा, एकपदरी व दोनपदरी मोत्यांच्या कंठ्या, बाजीराव कंठी, तोडे जोड, मोहरांची माळ, एकपदरी तुळशीची माळ, इमिटेशन नेकलेस, मस्त्य जोड आदी पारंपरिक व मौल्यवान अलंकार परिधान करण्यात आले.

सुवर्ण अलंकारांनी सजलेले श्री विठ्ठलाचे मनोहारी रूप भाविकांच्या आकर्षणाचे केंद्र ठरले आहे. गोकुळाष्टमीच्या निमित्ताने मंदिरात भक्तिमय वातावरण निर्माण झाले असून, भाविकांनी मोठ्या श्रद्धेने व भक्तिभावाने श्री विठ्ठलाचे दर्शन घेतले.