गोवा, उत्तराखंड, अरुणाचल विजयी

वृत्तसंस्था/ नवी दिल्ली

हॉकी इंडियाच्या 16 व्या उपकनिष्ठ पुरुषांच्या राष्ट्रीय हॉकी चॅम्पियनशिप स्पर्धेत शुक्रवारी झालेल्या विविध सामन्यात गोवा, उत्तराखंड आणि अरुणाचल प्रदेश यांनी प्रतिस्पर्ध्यांवर शानदार विजय मिळविले.

या स्पर्धेच्या तिसऱ्या दिवशी क गटातील झालेल्या सामन्यात गोवा संघाने राजस्थानचा 7-0 असा पराभव केला. या सामन्यात गोवा संघातर्फे करण कुमारने हॅट्ट्रीक टाकताना दुसऱ्या, 12 व्या आणि 44 व्या मिनिटाला असे 3 गोल केले. साहिल प्रमोदने 17 व्या मिनिटाला, दिलशाद अलीने 27 व्या मिनिटाला, श्रेयस हुंदरेने 30 व्या मिनिटाला तर अंकितने 38 व्या मिनिटाला गोल केले.

ब गटातील दुसऱ्या एका सामन्यात उत्तराखंडने बंगालचा 5-2 असा पराभव केला. उत्तराखंडतर्फे विकीसिंग बोराने तसेच गोविंदसिंगने प्रत्येकी 2 गोल नोंदविले. अमनकुमारने 1 गोल केला. बंगालतर्फे कर्णधार रिजू बार आणि सुझल तुरी यांनी प्रत्येकी 1 गोल केला.

ब गटातील झालेल्या सामन्यात अरुणाचल प्रदेशने बिहारचा 4-2 असा फडशा पाडला. अरुणाचल प्रदेशतर्फे शुभम राजभर, दीपक राव रमनश सिंग, मोहित यादव यांनी प्रत्येकी 1 गोल तर सुमन कुमार आणि कर्णधार अभय शहा यांनी बिहारतर्फे प्रत्येकी 1 गोल नोंदविला.