गोवा पोलिसांचे सायबर गुन्हेगारांवर छापासत्र

तब्बल अकरा राज्यांत एकाच वेळी छापे : सातजणांना अटक, 24 जणांना नोटीस

त. भा. प्रतिनिधी

पणजी : गोवा पोलिसांनी सायबर दक्षता मोहीम (ऑपरेशन सायबर व्हिजिल) यशस्वीरित्या राबवून गोव्यात नोंदवलेल्या 40 प्रकरणात सायबर-आधारित आर्थिक फसवणुकीत सामील असलेल्या व्यक्तींचा शोध घेऊन सात संशयितांना अटक केली तर 24 जणांना भारतीय न्याय संहिता कलम 35(3) अंतर्गत नोटीस बजावण्यात आली आहे. 21 इलेक्ट्रॉनिक उपकरणे जप्त करण्यात आली. या 40 प्रकरणांमध्ये एकूण 2 कोटी 50 लाख 65 हजार 402 ऊपयांची फसवणूक झाली आहे. पोलिस या प्रकरणांचा कसून तपास करीत आहेत.

अनेक राज्यांमध्ये कार्यरत असलेल्या संघटित सायबर फसवणूक नेटवर्कला उद्ध्वस्त करण्याच्या प्राथमिक उद्देशाने, सायबर गुन्हा विरोधी विभाग, उत्तर गोवा जिल्हा पोलिस, दक्षिण गोवा जिल्हा पोलिस, कुशावती जिल्हा पोलिस आणि गुन्हे शाखा पोलिस यांनी संयुक्तपणे ही मोहीम राबवली.

 अकरा राज्यांत 40 ठिकाणी छापे

या मोठ्या मोहिमेचा एक भाग म्हणून, पश्चिम बंगाल, राजस्थान, उत्तर प्रदेश, महाराष्ट्र, तामिळनाडू, तेलंगणा, दिल्ली, उत्तराखंड, केरळ, कर्नाटक आणि आसाम या 11 राज्यांमधील 40 हून अधिक ठिकाणी एकाच वेळी तपास आणि छापे टाकण्यासाठी सुमारे 40 पोलिसपथके तैनात करण्यात आली होती.

  तब्बल 313 बनावट बँक खाती

आर्थिक तपासाचा भाग म्हणून, गोव्यामध्ये विविध सायबर फसवणुकीशी संबंधित 313 बनावट बँक खाती (म्युल बँक अकाउंट्स) ओळखण्यात आली. त्या सर्वांची पडताळणी करण्यात आली, ज्यामध्ये त्यांच्या पूर्वेतिहासाची पडताळणी आणि मोठ्या संघटित सायबर गुन्हेगारी टोळ्यांमध्ये त्यांच्या संशयित सहभागाची तपासणी यांचा समावेश होता. या कारवाईदरम्यान, ज्या संबंधित राज्यांमध्ये या बनावट खात्यांची माहिती मिळाली होती, त्यांच्याशीही संपर्क साधण्यात आला.

या कारवाईदरम्यान, भारतीय नागरिक सुरक्षा संहितेच्या कलम 35(3) अंतर्गत 24 संशयितांना नोटीस बजावण्यात आली, तर विविध सायबर फसवणूक प्रकरणांमध्ये सात संशयितांना अटक करण्यात आली. याव्यतिरिक्त, पुढील तपासाला मदत करण्यासाठी आणि व्यापक गुन्हेगारी नेटवर्क उघडकीस आणण्यासाठी सखोल फॉरेन्सिक तपासणीकरिता 21 इलेक्ट्रॉनिक उपकरणे जप्त करण्यात आली.

‘ऑपरेशन सायबर व्हिजिल’ ही कारवाई पोलिस उपमहानिरीक्षक वेद प्रकाश सूर्या,  यांच्या देखरेखीखाली आणि पोलिस महानिरीक्षक के. आर. चौरसिया, व पोलिस महासंचालक आलोक कुमार. यांच्या सर्वांगीण मार्गदर्शनाखाली पार पाडण्यात आली.

ही कारवाई गुप्तचर माहितीवर आधारित पोलिसिंग, आंतरराज्यीय समन्वय आणि जलद कायदेशीर कारवाईच्या माध्यमातून सायबर-आधारित आर्थिक गुन्हेगारीचा मुकाबला करण्याची गोवा पोलिसांची दृढ वचनबद्धता दर्शवते. तसेच, नागरिकांना उदयोन्मुख डिजिटल धोक्यांपासून सुरक्षित ठेवताना, संघटित सायबर गुन्हेगारीच्या परिसंस्था ओळखण्यावर आणि त्या मोडून काढण्यावर असलेल्या आमच्या निरंतर लक्ष्यावरही ही कारवाई जोर देते.