‘गोवा फर्स्ट’साठी धर्मनिरपेक्ष शक्तींना एकत्र आणण्यावर भर; ‘गोवा फॉरवर्ड’ची भूमिका स्पष्ट

पणजी : गोव्याच्या राजकारणात आगामी विधानसभा निवडणुकीच्या पार्श्वभूमीवर आघाडीच्या चर्चांना वेग आला असताना, गोवा फॉरवर्ड पार्टीने आपली भूमिका स्पष्ट केली आहे. ‘गोवा सर्वप्रथम’ या भूमिकेसह गोव्यातील जनतेसाठी एक संयुक्त, धर्मनिरपेक्ष आणि जनकेंद्रित राजकीय पर्याय उभा करण्यासाठी समान विचारसरणीच्या शक्तींना एकत्र आणण्यास पक्ष कटिबद्ध असल्याचे पक्षाध्यक्ष विजय सरदेसाई यांनी स्पष्ट केले.

गोवा फॉरवर्डच्या म्हणण्यानुसार, गोव्याच्या व्यापक हितासाठी साधली जाणारी एकता ही केवळ पक्षाची प्राथमिकता नसून जबाबदारीही आहे. गोव्याचे हित, जनतेच्या अपेक्षा आणि राज्याची ओळख यांना केंद्रस्थानी ठेवून व्यापक राजकीय एकजूट उभी करण्याचा पक्षाचा प्रयत्न असल्याचे सांगण्यात आले आहे.

दरम्यान, 2027 च्या गोवा विधानसभा निवडणुकीच्या पार्श्वभूमीवर गोवा फॉरवर्ड आणि आम आदमी पक्षाने ‘गोवा फर्स्ट’ या आघाडीची घोषणा केली आहे. या आघाडीत अन्य समविचारी राजकीय शक्तींनाही सहभागी करून घेण्याची भूमिका मांडण्यात आली आहे.

या पार्श्वभूमीवर पक्षाध्यक्ष विजय सरदेसाई यांनी सध्या सुरू असलेल्या विविध तर्कवितर्कांवर भाष्य करताना, पक्षाकडून अधिकृतपणे कोणतीही अतिरिक्त माहिती जाहीर होईपर्यंत चर्चांना आणि अंदाजांना बाजूला ठेवावे, असे आवाहन केले आहे.

गोव्याच्या व्यापक हितासाठी समान विचारांच्या धर्मनिरपेक्ष शक्तींना एकत्र आणण्याची प्रक्रिया पुढे नेण्यावर पक्षाचा भर असून, अधिकृत निर्णय आणि घोषणा पक्षाच्या माध्यमातूनच केली जाईल, असे सरदेसाई यांनी स्पष्ट केले आहे.