बडेकोळ्ळमठ क्रॉसनजीक 60 हजारांचा गांजा जप्त

एकाला अटक, आणखी एकजण फरारी

बेळगाव : बडेकोळ्ळमठ क्रॉसजवळ गांजा विकणाऱ्या एका युवकाला अटक करण्यात आली आहे. हिरेबागेवाडी पोलिसांनी ही कारवाई केली असून त्याच्याजवळून 60 हजार रुपये किमतीचा 4 किलो 305 ग्रॅम गांजा जप्त करण्यात आला आहे. बेळगाव ग्रामीणचे एसीपी गंगाधर बी. एम.,हिरेबागेवाडीचे पोलीस निरीक्षक तुकाराम निलगार यांच्या मार्गदर्शनाखाली पोलीस उपनिरीक्षक अविनाश ए. वाय. व त्यांच्या सहकाऱ्यांनी शुक्रवार दि. 22 नोव्हेंबर रोजी सायंकाळी ही कारवाई केली आहे. या प्रकरणातील आणखी एक जण फरारी आहे. श्रेयांश गंगाप्पा बुधनूर (वय 32) रा. देवरशिग्गीहळ्ळी, ता. कित्तूर असे अटक करण्यात आलेल्या युवकाचे नाव आहे. बडेकोळ्ळमठ क्रॉसजवळील पुलाजवळ ही कारवाई करण्यात आली आहे. आझाद इस्माईल सनदी (वय 28) रा. मारगनकोप्प, ता. कित्तूर हा फरारी असून पोलीस त्याचा शोध घेत आहेत. श्रेयांश व आझाद या दोघा जणांविरुद्ध अमलीपदार्थ प्रतिबंधक कायद्यांतर्गत हिरेबागेवाडी पोलीस स्थानकात एफआयआर दाखल करण्यात आला आहे. या कारवाईत बी. सी. गुनगोळ, एस. बी. बाबण्णावर, पी. एस. भुशी, एस. एम. अल्लळ्ळी, पी. बी. बेविनमट्टी, पी. एस. कोचेरी आदींनी भाग घेतला.