सोलापूरच्या मध्यवर्ती बाजारपेठेत गणेशोत्सवाचा उत्साह; टिळक चौक ते मधला मारुती परिसर गर्दीने फुलला
सोलापूर : गणेशोत्सवाच्या पार्श्वभूमीवर सोलापूर शहरातील मध्यवर्ती बाजारपेठेत खरेदीची लगबग वाढली आहे. ऐतिहासिक टिळक चौक ते मधला मारुती परिसर गणेशभक्तांच्या गर्दीने गजबजला असून, बाप्पाच्या स्वागतासाठी आवश्यक साहित्य खरेदी करण्यासाठी नागरिक मोठ्या संख्येने बाजारपेठेत दाखल होत आहेत.
गणेशमूर्तीची सजावट, पूजासाहित्य तसेच घराच्या सजावटीसाठी लागणाऱ्या विविध वस्तूंनी बाजारपेठ सजली आहे. झेंडू, शेवंती, मोगरा यांसह विविध फुलांचे हार आणि आंब्याच्या पानांच्या तोरणांना मोठी मागणी आहे. गणपती आणि गौरीच्या पूजेसाठी लागणारे ताम्हण, पळी-भांडी, कलश तसेच तांबे-पितळेच्या पूजासाहित्याचीही मोठ्या प्रमाणात विक्री होत आहे.
गणेशोत्सवातील पारंपरिक साहित्याबरोबरच आधुनिक वस्तूंनाही ग्राहकांची पसंती मिळत आहे. घरगुती गणपतीपासून सार्वजनिक गणेश मंडळांच्या उत्सवापर्यंत विविध प्रकारचे रेडीमेड आणि खास तयार केलेले फेटे बाजारात उपलब्ध आहेत. त्यामुळे फेटे खरेदीसाठीही नागरिकांची गर्दी होत आहे.
गणेशोत्सवातील महत्त्वाचा नैवेद्य असलेल्या मोदकांमध्येही यंदा विविधता पाहायला मिळत आहे. पारंपरिक मोदकांसोबत काजू, बदाम, खजूर आणि चॉकलेटपासून तयार केलेल्या मोदकांची विक्री बाजारपेठेत सुरू झाली आहे. विविध चवी आणि आकर्षक स्वरूपातील मोदक ग्राहकांचे लक्ष वेधून घेत आहेत.
गणेशोत्सवाच्या खरेदीसाठी नागरिकांची वाढलेली गर्दी लक्षात घेता टिळक चौक ते मधला मारुती परिसरातील वाहतुकीतही आवश्यक बदल करण्यात आले आहेत. उत्सवाच्या दिवसांत बाजारपेठेतील गर्दी आणखी वाढण्याची शक्यता असून, व्यापारी आणि ग्राहक दोघांमध्येही गणेशोत्सवाचा उत्साह दिसून येत आहे.