नक्षलवाद्यांचा शस्त्रनिर्मितीचा कारखाना गडचिरोलीत उद्धवस्त महाराष्ट्र-छत्तीगड सीमेवरील बालबेडा जंगलात मोठी कारवाई, गडचिरोली पोलीस आणि सीआरपीएफ यांची संयुक्त कारवाई

नागपूर प्रतिनिधी
गडचिरोली जिह्यातील नक्षलविरोधी मोहिमेत सुरक्षा दलांना आणखी एक मोठे यश मिळाले आहे. महाराष्ट्र -छत्तीसगड सीमेवरील बालबेडा जंगल परिसरात नक्षलवाद्यांनी जमिनीखाली लपवून ठेवलेला शस्त्रनिर्मिती कारखाना गडचिरोली पोलीस आणि पेंद्रीय राखीव पोलीस दल (सीआरपीएफ) यांच्या संयुक्त कारवाईत उद्ध्वस्त करण्यात आला.
या कारवाईत 5 ते 6 टन वजनाची लेथ मशीन, 150 क्लेमोर व बीजीएल पाईप्स, 220 बारा बोअर पाईप्स तसेच शस्त्रनिर्मितीसाठी वापरले जाणारे मोठ्या प्रमाणातील साहित्य जप्त करण्यात आले. दुर्गम भागातून हे साहित्य बाहेर काढणे अशक्य असल्याने ते घटनास्थळीच सुरक्षितपणे नष्ट करण्यात आले.

सुरक्षा दलांवर मोठे हल्ले घडवून आणणे, निवडणुका किंवा नक्षल सप्ताहाच्या काळात घातपात करणे आणि शस्त्रसाठा वाढविणे या उद्देशाने नक्षलवाद्यांनी हा गुप्त कारखाना उभारल्याचा प्राथमिक अंदाज आहे. यापूर्वी 23 आणि 27 मे रोजी अशाच कारवायांमध्ये मोठा शस्त्रसाठा जप्त करण्यात आला होता. त्यानंतर आता या कारवाईमुळे नक्षलवाद्यांच्या रसद व्यवस्थेला आणखी मोठा धक्का बसल्याचे मानले जात आहे.

बालबेडा जंगल परिसरात नक्षलवाद्यांनी शस्त्रनिर्मितीचे साहित्य दडवून ठेवल्याची गोपनीय माहिती गडचिरोली पोलिसांना मिळाली होती. त्यानुसार पोलीस अधीक्षक एम. रमेश यांच्या मार्गदर्शनाखाली 26 जून रोजी विशेष अभियान पथक (सी -60), प्राणहिता पथक, बॉम्ब शोधक व नाशक पथक (बीडीडीएस) तसेच सीआरपीएफच्या जवानांच्या एकूण सहा तुकड्या शोध मोहिमेसाठी रवाना करण्यात आल्या. अत्यंत दुर्गम व डोंगराळ भाग असल्याने वरिष्ठ अधिकार्यांच्या सूचनेनुसार संपूर्ण साहित्य घटनास्थळीच नष्ट करण्यात आले.

तपासणीत जमिनीखाली पुरलेला मोठा शस्त्रनिर्मिती साठा उघडकीस
-5 ते 6 टन वजनाची लेथ मशीन,
-150 क्लेमोर व बीजीएल पाईप्स,
-220 बारा बोअर पाईप्स,
-20 रायफल रॉड मेटल पट्ट्या
-इतर साहित्य आढळून आले.

नक्षलविरोधी मोहिमेला मोठे यश
गडचिरोली जिह्यात नक्षलवादाविरोधात सुरू असलेल्या सातत्यपूर्ण कारवायांमुळे नक्षल चळवळीचा प्रभाव दिवसेंदिवस कमी होत असल्याचे या कारवाईवरून स्पष्ट होत आहे. ही कारवाई पोलीस अधीक्षक एम. रमेश यांच्या नेतफत्वाखाली अप्पर पोलीस अधीक्षक (अभियान) कार्तिक मधिरा, अप्पर पोलीस अधीक्षक (प्रशासन) गोकुल राज जी, पोलीस उपअधीक्षक (अभियान) विशाल नागरगोजे यांच्या देखरेखीखाली विशेष अभियान पथक, प्राणहिता, इंटेलिजन्स सेल, बीडीडीएस आणि सीआरपीएफच्या जवानांनी संयुक्तपणे पार पाडली. या धाडसी आणि यशस्वी कारवाईबद्दल संबंधित जवानांचे वरिष्ठ अधिकार्यांनी कौतुक केले आहे.