चालकाशिवाय 84 किमीपर्यंत धावली मालगाडी

► वृत्तसंस्था/ चंदीगड

जम्मू-काश्मीरच्या कथुका रेल्वेस्थानकावर रविवारी सकाळी अजब चित्र दिसून आले. येथे उभी असलेली एक मालगाडी रेल्वे चालकाशिवायच धावू लागली आणि पाहता पाहता काही क्षणांमध्ये या मालगाडीने वेग पकडला. ही रेल्वे चालकाशिवाय 84 किलोमीटर अंतरापर्यंत धावत राहिली. अखेर पंजाबच्या मुकेरियांमध्ये या मालगाडीला रोखण्यात आले.

मालगाडी क्राँक्रिट घेऊन पठाणकाच्या दिशेने प्रवास करत होती. रेल्वेचा लोकोपायलट (एकप्रकारे चालक) आणि को-पायलट कथुआ स्थानकावर चहा पिण्यासाठी थांबले होते, तेथे कथित स्वरुपात इंजिन सुरू होते. खाली उतरण्यापूर्वी हँडब्रेक ओढण्यास दोघेही विसरले होते.

मालगाडी धावू लागल्यावर ती रोखण्याचा प्रयत्न करण्यात आला परंतु त्यात प्रारंभी यश आले नाही. अखेर प्रवासी रेल्वेंचे चालक आणि कर्मचाऱ्यांच्या मदतीने दसूहा येथे मालगाडी रोखण्यात आली. याप्रकरणी तपास सुरू करण्यात आल्याची माहिती जम्मूतील रेल्वे अधिकाऱ्यांकडून देण्यात आली आहे.