तामिळनाडूमध्ये फॉक्सकॉन 15 हजार कोटी गुंतवणार

जवळपास 14 हजार नवीन रोजगाराच्या संधी उपलब्ध होणार : उद्योगमंत्री टीआरबी राजा यांची माहिती

वृत्तसंस्था/ नवी दिल्ली

जगातील सर्वात मोठी इलेक्ट्रॉनिक्स कंत्राट उत्पादक कंपनी, फॉक्सकॉन ग्रुप तामिळनाडूमध्ये सुमारे 15,000 कोटी रुपयांची गुंतवणूक करणार आहे. राज्यात विस्ताराच्या पुढील टप्प्यात कंपनी 14,000 नवीन रोजगार निर्माण करणार असल्याचा दावाही यावेळी केला आहे.

या नोकऱ्या उच्च मूल्य अभियांत्रिकीशी संबंधित असतील. राज्याचे उद्योग मंत्री टीआरबी राजा यांनी सोमवारी ही माहिती दिली. नवीन गुंतवणूक प्रामुख्याने कृत्रिम बुद्धिमत्ता (एआय) आधारित प्रगत तंत्रज्ञान ऑपरेशन्स, मूल्यवर्धित उत्पादन आणि संशोधन आणि विकास (आर अँड डी) एकत्रीकरणात असेल. फॉक्सकॉन ग्रुप अनेक ठिकाणी ही गुंतवणूक करेल याची पुष्टी एका सूत्राने केली. तैवानमधील या प्रमुख कंपनीच्या उच्च अधिकाऱ्यांच्या शिष्टमंडळाने सोमवारी चेन्नईला भेट दिली आणि भारतात पहिल्यांदाच फॉक्सकॉन डेस्कची स्थापना करण्याची घोषणा केली. जलद प्रकल्प समन्वय, गुंतवणूकदार सुविधा आणि मिशन-मोड अंमलबजावणी सुनिश्चित करण्यासाठी हे मार्गदर्शन डेस्क तामिळनाडूमध्ये (राज्य गुंतवणूक प्रोत्साहन नोडल एजन्सी) स्थापन केले जाईल.

राजा यांनी एक्स या प्लॅटफॉर्मवर लिहिले, ‘फॉक्सकॉनने 15,000 कोटी रुपयांची गुंतवणूक आणि 14,000 उच्च-मूल्यवान नोकऱ्यांचे आश्वासन दिले आहे! अभियंते तयार आहेत!’ ही कंपनी आयफोनच्या निर्मितीसाठी ओळखली जाते आणि तिच्या क्लायंटमध्ये अॅपल, गुगल, सोनी, अमेझॉन, डेल, मायक्रोसॉफ्ट, सिस्को आणि इंटेल यांचा समावेश आहे.

सर्वात मोठ्या गुंतवणुकींपैकी एक

ही गुंतवणूक अलीकडच्या काळात समूहाने भारतात केलेल्या सर्वात मोठ्या गुंतवणुकींपैकी एक मानली जाते. फॉक्सकॉनच्या अलीकडच्या प्रमुख गुंतवणुकींमध्ये उत्तर प्रदेशातील एचसीएल आणि फॉक्सकॉन जेव्हीमधील सेमीकंडक्टर आउटसोर्स केलेले सेमीकंडक्टर असेंब्ली आणि टेस्ट युनिट आणि कर्नाटकातील देवनहळ्ळी युनिटमधील आयफोन 17 उत्पादन यांचा समावेश आहे. उत्तर प्रदेशातील हे युनिट 2027 पर्यंत कार्यान्वित होण्याची शक्यता आहे.