दिल्लीत काँग्रेसला मोठा झटका माजी आमदाराचा ‘आप’प्रवेश

वृत्तसंस्था/ नवी दिल्ली

दिल्ली विधानसभा निवडणुकीपूर्वी काँग्रेस पक्षाला मोठा झटका बसला आहे. वरिष्ठ काँग्रेस नेते आणि पाचवेळा आमादर राहिलेले मतीन अहमद यांनी रविवारी आम आदमी पक्षात प्रवेश केला आहे. अरविंद केजरीवाल यांनी अहमद यांचे पक्षात स्वागत केले आहे.

उत्तर-पूर्व दिल्लीच्या सीलमपूर मतदारसंघातून 5 वेळा निवडून आलेले माजी आमदार मतीन अहमद यांच्यापूर्वी त्यांचे पुत्र जुबैर अहमद यांनी आम आदमी पक्षात प्रवेश केला होता. यमुनापार क्षेत्रात चौधरी मतीन अहमद हे लोकांमध्ये राहून त्यांची सेवा करत आले आहेत. अहमद यांचे आम आदमी पक्षात स्वागत असल्याचे केजरीवाल यांनी म्हटले आहे.

मतीन अहमद यांना दिल्लीतील दिग्गज मुस्लीम नेते म्हणून ओळखले जाते. सीलमपूर मतदारसंघात त्यांचा मोठा प्रभाव आहे. अहमद हे दिल्ली वक्फ बोर्डाचे अध्यक्ष आणि दिल्ली जलबोर्डाचे उपाध्यक्ष देखील राहिले ओत.