आझमनगर परिसरातील फूटपाथवरील विक्रेत्यांना हटविले

बेळगाव : शहरातील बहुसंख्य फूटपाथ व सायकल ट्रॅकचे मार्ग विक्रेत्यांनी अडविल्याने या फूटपाथना विक्रेत्यांचा विळखाच पडला आहे. त्यामुळे नागरिकांसाठी या फूटपाथचा उपयोग शून्य ठरत आहे. अलीकडेच ‘तरुण भारत’ने याबाबत वृत्त प्रसिद्ध केले होते. महानगरपालिकेने आता शहरामधील फूटपाथ मोकळे करण्याची मोहीम हाती घेतली आहे. गुरुवारी आझमनगर परिसरातील ज्या बैठ्या विक्रेत्यांनी फूटपाथवर बसून विक्री सुरू केली होती, त्या सर्वांना हटविण्यात आले. तसेच कंत्राटदारालासुद्धा याबाबत जाब विचारून अधिकाऱ्यांनी धारेवर धरले. महानगरपालिकेचे अधिकारी आदिल खान यांनी पोलिसांच्या सहकार्याने ही मोहीम राबविली.