अखेर बंद असलेली कचरा गाडी हलगा गावात पुन्हा सुरू

किणये : हलगा गावातील कचरा गाडी गेल्या दोन महिन्यापासून बंद होती. यापूर्वी गावात सदर कचरा गाडी फिरून नागरिकांच्या घराघरातून कर्मचारी कचरा जमा करत होते. मात्र ही योजना गेल्या दोन महिन्यापासून बंद होती. त्यामुळे नागरिकांतून नाराजीचे सूर उमटले होते. अखेर ग्रामस्थांच्या मागणीचा विचार करून ग्रामपंचायतीने पुन्हा कचरा गाडी सुरू केली आहे. गावात सुरू असलेली कचरा गाडी अचानक बंद झाली. यामुळे ही योजना नेमकी कशामुळे बंद पडली. याची चर्चा गावात सुरू होती. तसेच नागरिकांना कचऱ्याची विल्हेवाट लावणे मुश्कील बनले होते आणि या कचऱ्याची समस्या ही निर्माण झाली होती. गावातील काही नागरिकांनी ग्रामपंचायतीकडे कचरा गाडी सुरू करण्याची मागणी केली होती. हलगा ग्रामपंचायतीच्या वतीने पुन्हा गेल्या दोन दिवसापासून गावात कचरा गाडी सुरू केली आहे. ग्रामपंचायतीचे कर्मचारी घरोघरी फिरून कचरा जमा करून तो कचरा गाडीमध्ये टाकण्यात येत आहे. गावात कचरा गाडी फिरून कचऱ्याची उचल होत असल्यामुळे नागरिकांमध्ये समाधानाचे वातावरण निर्माण झाले आहे.