जागेच्या प्रश्नावरून दोन गटात मारामारी

कराड :

विरवडे (ता. कराड) येथील एका जागेच्या मालकीच्या वादातून बुधवारी सकाळी दोन गटात मारामारी झाली. मारामारीत जखमी झालेल्या काही लोकांवर उपजिल्हा रुग्णालयात उपचार करण्यात आले. तर एकावर खासगी रुग्णालयात उपचार सुरू आहेत. कराड शहर पोलिसांत याबाबत रात्री उशिरापर्यंत गुन्हा दाखल करण्याचे काम सुरू होते.

घटनास्थळावरून मिळालेल्या माहितीनुसार, विरवडे येथील एका जागेच्या मालकीवरून अनेक वर्षांपासून वाद सुरू आहेत. मागील दोन ते महिन्यांपासून या जागेवरून अधिकच धुसफूस वाढली होती. बुधवारी सकाळी 10 वाजण्याच्या सुमारास या धुसफुशीचे रुपांतर मारामारीत झाले. या मारामारीत दोन्ही गटातील काही लोक जखमी झाले असून त्यांच्यावर उपजिल्हा रुग्णालयात उपचार करण्यात आल्याची तसेच एकावर खासगी रुग्णालयात उपचार सुरू असल्याची माहिती घटनास्थळावरून मिळाली.

घटनेची माहिती मिळाल्यानंतर उपजिल्हा रुग्णालय व कराड शहर पोलीस स्टेशनसमोर लोकांनी मोठी गर्दी केली होती. रात्री उशिरापर्यंत गुन्हे दाखल करण्याचे काम सुरू होते. त्यामुळे अधिकृत माहिती मिळू शकली नाही.