सोकपिटच्या वादातून पिता-पुत्रावर लाकडी दांडक्याने हल्ला; चौघांविरुद्ध गुन्हा

सत्तरी : सोकपिटच्या मुद्द्यावरून झालेल्या वादातून ३९ वर्षीय व्यावसायिक आणि त्याच्या वडिलांवर लाकडी दांडक्याने हल्ला केल्याची घटना भुईपाल, सत्तरी येथील बेडशे वाडा परिसरात घडली. या प्रकरणी पोलिसांनी चार जणांविरुद्ध गुन्हा दाखल केला आहे.

मिळालेल्या माहितीनुसार, सोकपिटच्या बांधकामावरून संबंधित पक्षांमध्ये वाद निर्माण झाला. या वादाचे रूपांतर हाणामारीत झाले. यावेळी संशयितांनी व्यावसायिक आणि त्याच्या वडिलांना लाकडी दांडक्याने मारहाण केल्याचा आरोप आहे. तसेच दोघांना गंभीर परिणामांची धमकी दिल्याचेही तक्रारीत नमूद करण्यात आले आहे.

घटनेनंतर पीडितांनी पोलिसांकडे धाव घेत तक्रार दाखल केली. त्यानुसार पोलिसांनी चार जणांविरोधात गुन्हा नोंदवून प्रकरणाचा तपास सुरू केला आहे. हल्ल्याचे नेमके कारण, वादाची पार्श्वभूमी आणि घटनेतील इतर बाबींचा तपास पोलिसांकडून करण्यात येत आहे.