कंग्राळी भागात बाप्पाला भक्तिभावाने निरोप

वार्ताहर/कंग्राळी बुद्रुक

गणपती बाप्पा मोरया, पुढच्या वर्षी लवकर या, अशा जयघोषात कंग्राळी बुद्रुक, गौंडवाड, यमनापूर, शाहूनगर, वैभवनगर, परिसरातील घरगुती व सार्वजनिक गणेशोत्सव मंडळांच्या गणेशमूर्तींना निरोप देण्यात आला. मंगळवारी सकाळपासून परिसरात घरगुती गणेशमूर्तीचे विसर्जन करण्यात येत  होते. कंग्राळी खुर्द येथे मरगाईनगर सार्वजनिक विहीर गावाजवळील तलाव, किगदी तलाव, गौंडवाड, लक्ष्मी तलाव व भरमतलाव, यमनापूर, गौंडवाड भरम तलाव, शाहूनगर, वैभवनगर, किगदी आदी ठिकाणी घरगुती गणेशमूर्तीचे विसर्जन केल्याचे चित्र दिसून आले.

कंग्राळी बुद्रुक येथे 10 ते 12, गौंडवाड एक, यमनापूर 2, वैभवनगर 3-4, शाहूनगर 2 सार्वजनिक गणेशोत्सव मंडळांनी वस्तुंचा लिलाव करून ट्रॅक्टरमध्ये गणेशमूर्ती ठेवून 10 नंतर मिरवणुकीला प्रारंभ करण्यात आला. यावेळी मिरवणुकीमध्ये गणेशभक्त भक्तीगीतांच्या तालावर नृत्य करत असल्याचे दिसून येत होते.