अपघातात पर्वरीचे सख्खे भाऊ ठार

अन्य दोघे जखमी, ट्रकने कारला ठोकरल्याने दुर्घटना : पर्वरीचे कुटुंब कोईम्बतूरला जाताना मंड्या येथे अपघात

म्हापसा : पर्वरी येथील चौघेजण कोईम्बतूरला जात असताना मंगळुरू-बंगळुरू महामार्गावरील मंड्या येथे झालेल्या भीषण अपघातात त्यातील दोघे सख्खे भाऊ जागीच ठार झाले तर कारचालक व अन्य एक जखमी झाले आहेत. मिळालेल्या माहितीनुसार पर्वरी येथील रॉस वाझ, डेरील वाझ (सख्खे भाऊ), नॅथन वाझ आणि नील फारिया हे आपल्या फॉरच्युनर कारने कोईम्बतूरला जात असताना मंगळुरू-बंगळुरू महामार्गावरील मंड्या येथे समोरून येणाऱ्या ट्रकने कारच्या डाव्या बाजूला जोरदार धडक दिली. या अपघातात रॉस वाझ आणि डेरील ब्राझ यांचा जागीच मृत्यू झाला. कारचालक नॅथन वाझ आणि नील फारिया हे दोघे गंभीर जखमी झाले. बुधवारी रात्री उशिरा हा अपघात घडला. त्यातील नॅथन वाझ हा मृत डेरील वाझ यांचा मुलगा असून नील फारिया हे म्हापसा येथील उद्योजक आहेत. कर्नाटक पोलिसांनी अपघाताचा पंचनामा केला असून ट्रक चालकावर गुन्हा दाखल केला आहे. कर्नाटक पोलिस याप्रकरणी अधिक तपास करीत आहेत.