सेन्सेक्स-निफ्टीमध्ये अंतिम सत्रात पडझड

सेन्सेक्स 600 तर निफ्टी 154 अंकांनी नुकसानीत : आयटीच्या समभागातील तणावाचा बाजारावर परिणाम

वृत्तसंस्था मुंबई

भारतीय भांडवली बाजारात चालू आठवड्यातील अंतिम सत्रात बीएसई  सेन्सेक्स आणि एनएसई निफ्टी यांचे निर्देशांक घसरणीसह बंद झाले आहेत. आयटी स्टॉक्समुळे बाजारातील तणावात भर पडल्याचे चित्र राहिले होते, तर जिओ प्लॅटफॉर्म्सचा आयपीओ आणि एआय-सॅटेलाइट विस्ताराची घोषणा यामुळेही बाजारात काहीशी चर्चा राहिली.

भारतीय शेअर बाजार दबावाखाली बंद झाला. जागतिक आयटी क्षेत्रातील प्रमुख कंपनी अॅक्सेंचरच्या विक्रीचे कमकुवत अंदाज आणि निराशाजनक दृष्टिकोनाचा देशांतर्गत आयटी स्टॉक्सवरही दबाव आला. मुख्य कंपन्यांच्या कामगिरीनंतर बीएसई सेन्सेक्स दिवसअखेर 608.08 अंकांच्या घसरणीसह निर्देशांक 76,802.90 वर बंद झाला. दुसऱ्या बाजूला राष्ट्रीय शेअर बाजाराचा निफ्टी हा 154.91 अंकांनी प्रभावीत होत निर्देशांक 24,013.10 वर बंद झाले.

निफ्टीमध्ये इन्फोसिस, टाटा कन्सल्टन्सी सर्व्हिसेस आणि टेक महिंद्रा हे सर्वाधिक घसरण झालेल्या कंपन्यांमध्ये होते. आयटी क्षेत्रात मोठ्या प्रमाणात विक्री झाल्यामुळे बाजारातील वातावरण कमजोर राहिले.

मिडकॅप आणि स्मॉलकॅप तेजीत

प्रमुख निर्देशांकांमध्ये घसरण होऊनही व्यापक बाजारपेठा तुलनेने मजबूत राहिल्या. निफ्टी मिडकॅप निर्देशांक 0.22 टक्क्यांनी आणि निफ्टी स्मॉलकॅप निर्देशांक 0.42 टक्क्यांनी वधारून बंद झाला, ज्यामुळे गुंतवणूकदारांची निवडक मिड आणि स्मॉलकॅप शेअर्समध्ये रुची कायम राहिली.

फार्मा क्षेत्र चमकले, आयटी सर्वात कमजोर

क्षेत्रीय कामगिरीच्या बाबतीत, निफ्टी आयटी निर्देशांकात सर्वात मोठी घसरण नोंदवली गेली. याशिवाय, रिअल्टी, ऑटो आणि तेल व वायू क्षेत्रे देखील दबावाखाली आहेत. त्याच वेळी, फार्मा शेअर्समध्ये खरेदी दिसून आली आणि हे क्षेत्र दिवसभरातील सर्वोत्तम कामगिरी करणारे क्षेत्र ठरले.

जिओ प्लॅटफॉर्म्सच्या आयपीओला हिरवा कंदील

रिलायन्स इंडस्ट्रीजच्या 49 व्या वार्षिक सर्वसाधारण सभेत (एजीएम), अध्यक्ष मुकेश अंबानी यांनी घोषणा केली की, जिओ प्लॅटफॉर्म्सच्या ड्राफ्ट रेड हेरिंग प्रॉस्पेक्टसला (डीआरएचपी) संचालक मंडळाने मंजुरी दिली आहे. कंपनीच्या प्रस्तावित आयपीओमध्ये 27 कोटी नवीन शेअर्स जारी केले जातील. आयपीओशी संबंधित कागदपत्रे शुक्रवारी दाखल केली जात आहेत.