इंग्लंड टी-20 मालिका विजेता

वृत्तसंस्था / ग्रोस आयलेट (सेंट लुसीया)

पाच सामन्यांच्या टी-20 मालिकेत इंग्लंडने  यजमान विंडीजचा 3-1 अशा फरकाने पराभव केला. या मालिकेतील पाचवा सामना पावसामुळे रद्द करण्यात आला.

या शेवटच्या आणि पाचव्या सामन्यात पावसाचा अडथळा आल्याने केवळ 5 षटकांचा खेळ झाला. विंडीजने 5 षटकात बिनबाद 44 धावा जमविल्या होत्या. यानंतर पुन्हा वादळी पावसाला प्रारंभ झाल्याने पंचांनी खेळ थांबविला. मैदानावर तसेच खेळपट्टीवर पाणी साचल्याने पंचांनी अखेर हा सामना रद्द झाल्याची घोषणा केली. विंडीजच्या 5 षटकांच्या खेळात लेव्हीस 29 तर हॉप 14 धावां नाबाद राहिले. या मालिकेत इंग्लंडने पहिला  सामना 8 गड्यांनी, दुसरा सामना 7 गड्यांनी तर तिसरा सामना 3 गड्यांनी जिंकून मालिका सिलबंद केली होती. चौथ्या सामन्यात विंडीजने इंग्लंडचा 5 गड्यांनी पराभव करुन इंग्लंडची ही आघाडी थोडी कमी केली होती. इंग्लंडच्या या विंडीज दौऱ्यामध्ये वनडे आणि टी-20 मालिका खेळविल्या गेल्या. विंडीजने वनडे मालिका 2-1 अशा फरकाने जिंकली होती. त्यानंतर इंग्लंडने या दौऱ्यात टी-20 मालिका जिंकली. या दोन्ही मालिकांमध्ये 7 सामन्यांत नाणेफेक जिंकणारा संघ तसेच दुसऱ्यांदा फलंदाजी करणारा संघ विजयी ठरला.