ईडीच्या धाडी...राजकीय कुरघोडी ?

कर्नाटकात अनुसूचित जाती-जमातींच्या नेत्यांवर केंद्रीय यंत्रणांकरवी कारवाई करून त्यांना टार्गेट केले जात असल्याचा आरोप काँग्रेस नेत्यांनी केला आहे. मुख्यमंत्री डी. के. शिवकुमार यांनी तर ईडीची कारवाई राजकीय हेतूने प्रेरित असल्याचा आरोप करतानाच काँग्रेस सरकारमधील आणखी अनेक नेत्यांवर कारवाई होणार आहे, याचे सूतोवाच केले आहे. आपल्या सरकारमधील नेत्यांना टार्गेट केले जात आहे. काही नेत्यांना यासंबंधी आपण आधीच कल्पना दिली आहे, असेही मुख्यमंत्र्यांनी सांगितले आहे. याचाच अर्थ काँग्रेस सरकारमधील अनेक मंत्री-आमदारांची नावे केंद्रीय यंत्रणांच्या रडारवर आहेत, असाच होतो.

डी.के. शिवकुमार सरकारला शंभर दिवस पूर्ण झाले आहेत. 3 जून रोजी तेरा मंत्र्यांसमवेत शिवकुमार यांनी मुख्यमंत्रिपदाची शपथ घेतली होती. पहिल्याच मंत्रिमंडळ बैठकीत विद्यार्थ्यांना मोफत बसपास, सरकारी कर्मचाऱ्यांची भरती प्रक्रिया, भारत जोडो युवा संघटना आदींची घोषणा करण्यात आली होती. एकीकडे डी. के. शिवकुमार आपल्या सरकारला शंभर दिवस पूर्ण झाल्याच्या आनंदात असतानाच काँग्रेसचे प्रभावी नेते व सार्वजनिक बांधकाम खात्याचे मंत्री सतीश जारकीहोळी, त्यांचे कुटुंबीय व आप्तेष्टांवर ईडीने छापे टाकले आहेत. गुरुवारी मुख्यमंत्री डी. के. शिवकुमार, माजी मुख्यमंत्री सिद्धरामय्या, उपमुख्यमंत्री डॉ. जी. परमेश्वर आदींच्या प्रमुख उपस्थितीत विशेष कार्यक्रमाचे आयोजन करण्यात आले होते. ईडीने कारवाईसाठी एक दिवस आधीचा मुहूर्त साधला आहे. मुख्यमंत्र्यांसह काँग्रेसच्या बहुतेक नेत्यांनी ही कारवाई राजकीय हेतूने प्रेरित असल्याचा आरोप केला आहे.

अहिंद वर्गाचे नेतृत्व करणारे सतीश जारकीहोळी हे काँग्रेसचे प्रभावी नेते आहेत. राजकारणाबरोबरच समाजकारण व उद्योग व्यवसायातही ते सक्रिय आहेत. गौतम बुद्ध, बसवेश्वर व डॉ. बाबासाहेब आंबेडकरांच्या विचारांनी प्रेरित होऊन समतेचा पुरस्कार करणारे सतीश जारकीहोळी हे 2028 मध्ये मुख्यमंत्री पदासाठीचे दावेदार आहेत. यासाठी आतापासूनच त्यांनी तयारी सुरू केली आहे. त्यांची कन्या प्रियांका जारकीहोळी या चिकोडीच्या खासदार आहेत. रमेश जारकीहोळी, भालचंद्र जारकीहोळी हे गोकाक व अरभावीचे आमदार आहेत. त्यांचे आणखी एक बंधू लखन जारकीहोळी हे विधान परिषदेचे सदस्य आहेत. एकेकाळी केवळ गोकाक, बेळगावपुरते मर्यादित असलेले हे कुटुंब आता राज्याच्या राजकारणात सक्रिय आहे. देशाच्या राजकारणाच्या दिशेनेही त्यांची वाटचाल सुरू आहे. बुधवार दि. 9 सप्टेंबर रोजी सकाळपासून गुरुवारी सायंकाळनंतरही बेंगळूर, बेळगाव, गोकाकसह विविध भागात सतीश जारकीहोळी व त्यांच्या आप्तेष्टांवरील कारवाई सुरूच होती.

महर्षी वाल्मिकी निगममधील आर्थिक गैरव्यवहार उघडकीस आल्यानंतर मंत्री बी. नागेंद्र यांना सिद्धरामय्या सरकारमध्ये राजीनामा द्यावा लागला होता. आता डी. के. शिवकुमार सरकारमध्येही याच प्रकरणावरून दुसऱ्यांदा राजीनामा देण्याची वेळ त्यांच्यावर आली. नागेंद्र यांच्यानंतर ईडीने सतीश जारकीहोळी यांच्यावर कारवाई सुरू केली आहे. कर्नाटकात अनुसूचित जाती-जमातींच्या नेत्यांवर केंद्रीय यंत्रणांकरवी कारवाई करून त्यांना टार्गेट केले जात असल्याचा आरोप काँग्रेस नेत्यांनी केला आहे. मुख्यमंत्री डी. के. शिवकुमार यांनी तर ईडीची कारवाई राजकीय हेतूने प्रेरित असल्याचा आरोप करतानाच काँग्रेस सरकारमधील आणखी अनेक नेत्यांवर कारवाई होणार आहे, याचे सूतोवाच केले आहे. आपल्या सरकारमधील नेत्यांना टार्गेट केले जात आहे. काही नेत्यांना यासंबंधी आपण आधीच कल्पना दिली आहे, असेही मुख्यमंत्र्यांनी सांगितले आहे. याचाच अर्थ काँग्रेस सरकारमधील अनेक मंत्री-आमदारांची नावे केंद्रीय यंत्रणांच्या रडारवर आहेत, असाच होतो.

गृहमंत्री प्रियांक खर्गे यांनीही आपल्यावरही कारवाई होऊ शकते, असे बोलून दाखवले आहे. दोन महिन्यांपूर्वी सतीश जारकीहोळी यांचे भावोजी व अबकारी विभागातील वरिष्ठ अधिकारी डॉ. वाय. मंजुनाथ यांच्यावर ईडीची कारवाई झाली होती. या कारवाईनंतर अबकारी विभागात सुरू असलेल्या भ्रष्टाचाराच्या रॅकेटचा पर्दाफाश झाला होता. तेव्हापासूनच आणखी काही जणांवर कारवाई होणार अशी अटकळ होती. आता सतीश जारकीहोळी, त्यांची कन्या खासदार प्रियांका जारकीहोळी, चिरंजीव राहुल जारकीहोळी, भावोजी डॉ. वाय. मंजुनाथ यांच्यासह त्यांच्या इतर स्वकियांवर 18 ठिकाणी ईडीने छापे टाकले आहेत. गुरुवारी सायंकाळनंतरही कारवाई सुरूच होती. त्यामुळे ईडीच्या छाप्यात नेमके काय गवसले? याचा उलगडा झाला नसला तरी सतीश जारकीहोळी व त्यांच्या कुटुंबीयांच्या नावे असलेल्या परदेशातील गुंतवणुकीच्या मागे ईडीचे अधिकारी लागले आहेत हे स्पष्ट झाले आहे.

डॉ. वाय. मंजुनाथ यांच्यावर कारवाई झाली, त्याचवेळी सतीश जारकीहोळी व त्यांच्या कुटुंबीयांच्या परदेशातील गुंतवणुकीविषयी कागदपत्रे आढळून आली होती. त्या आधारावर ‘फेमा’ कायद्यांतर्गत ईडीने तपासणी सुरू केल्याची प्राथमिक माहिती आहे. काँग्रेसचे प्रदेशाध्यक्ष बी. के. हरिप्रसाद यांनी तर या कारवाईमुळे आपल्याला आश्चर्य वाटत नाही. कारण, काँग्रेस नेत्यांवर केंद्रीय यंत्रणांचा वापर करून कारवाई करणार याची अपेक्षा होतीच. विरोधकांना घाबरवण्यासाठी वॉशिंग मशीनचे हे तंत्र आहे, अशा शब्दात त्यांनी आपली प्रतिक्रिया व्यक्त केली आहे. वेगवेगळ्या राज्यातील ईडीने आजवर केलेल्या कारवाईनंतर असे नेते भाजपच्या गळाला लागतात. त्यांच्या वॉशिंग मशीनमध्ये स्वच्छ होऊन आरोपमुक्त होऊन पुन्हा नव्याने जीवन जगतात, असाच याचा अर्थ होतो. मंत्री बी. नागेंद्र यांच्या राजीनाम्यासाठी भाजपने ‘बळ्ळारी चलो’ची पदयात्रा हाती घेतली होती. नागेंद्र यांनी राजीनामा दिल्यानंतरही ही पदयात्रा झाली. गुरुवारी बळ्ळारीत पदयात्रेचा समारोप झाला. या पदयात्रेच्या माध्यमातून भाजप 2028 च्या निवडणुकीची तयारी करत आहे, असाच याचा अर्थ काढला जात आहे. सतीश जारकीहोळी यांच्यावरील ईडीच्या कारवाईनंतर भाजपला काँग्रेस विरुद्ध आणखी एक अस्त्र मिळाले आहे. पुढील राजकीय वाटचालीसाठी भाजपची या पदयात्रेच्या निमित्ताने रंगीत तालीमच झाली आहे. बी. वाय. विजयेंद्र यांच्या नेतृत्वाला अनेक ज्येष्ठ नेत्यांनी आव्हान दिले होते. या आव्हानावर मात करून आपले नेतृत्व आणखी खोलवर रुजवण्यासाठी विजयेंद्र यांना पदयात्रा अनुकूलच ठरली.

रमेश हिरेमठ