एमएलआयआरसीमध्ये ई-बाईक रॅली, वीर नारींचा सन्मान

बेळगाव : येथील मराठा लाईट इन्फन्ट्री रेजिमेंटल सेंटरमध्ये (एमएलआयआरसी) ई-बाईक रॅली व निवृत्त कर्मचाऱ्यांना मार्गदर्शनपर कार्यक्रम शनिवारी झाला. पर्यावरणाचा समतोल राखण्यात लष्कराची बांधिलकी या उद्देशातून बाईक रॅलीचे आयोजन केले होते. याच कार्यक्रमात लष्करातील निवृत्त कर्मचारी व कुटुंबातील सदस्यांना निवृत्ती वेतनसंबंधीची धोरणे समजावून देण्यात आली. तसेच तक्रारींचे निराकरण करून कागदपत्रांची जुळवाजुळव याबद्दल माहिती देण्यात आली.   एमईजी सेंटरचा 244 वा स्थापना दिन व कारगिल विजय दिनाच्या 25 व्या वर्धापन दिनानिमित्त शूर वीरांच्या स्मरणार्थ शर्कत वॉर स्मारकाला पुष्पहार अर्पण करून मानवंदना देण्यात आली. त्यानंतर वीर जवानांनी देशासाठी पत्करलेल्या हौतात्म्याचे स्मरण करून वीर नारींचा (शहीद जवानांच्या पत्नी) सन्मान करण्यात आला.