Ratnagiri Turtle News: ओमान ते पुन्हा रत्नागिरीच्या वाटेवर 'धवललक्ष्मी' ; ३,५०० किमीचा कासवाचा प्रवास!

वनविभागाचे यशस्वी संशोधन; धवललक्ष्मीच्या प्रवासामुळे समुद्री मार्गांचे रहस्य उलगडले

रत्नागिरी: निसर्गाची किमया आणि विज्ञानाला थक्क करणारी एक आश्चर्यकारक घटना समोर आली आहे. रत्नागिरीच्या किनारपट्टीवरून अरबी समुद्रात झेपावलेल्या 'धवललक्ष्मी' नावाच्या ऑलिव्ह रिडले कासवाने तब्बल ३,५०० किलोमीटरचा प्रवास करून ओमान गाठले होते. आता ही धाडसी समुद्रयात्री पुन्हा आपल्या मायभूमीच्या ओढीने रत्नागिरीच्या दिशेने परतत आहे.

निसर्गाचा ‘जीपीएस’ पाहून शास्त्रज्ञ चकित

कोणत्याही आधुनिक दिशादर्शक यंत्रणेशिवाय हजारो मैल दूर गेल्यावर पुन्हा आपल्या मूळ अधिवासाकडे परतण्याची कासवांची ही क्षमता वैज्ञानिकांना विचार करायला लावणारी आहे. सध्या धवललक्ष्मी रत्नागिरीपासून साधारण ८०० किलोमीटर अंतरावर असून ती वेगाने भारतीय किनारपट्टीकडे सरकत आहे.

जखमी अवस्थेपासून 'ग्लोबल' प्रवासापर्यंतचा टप्पा

काही महिन्यांपूर्वी धवललक्ष्मी जखमी अवस्थेत सापडली होती. वनविभागाने तिच्यावर यशस्वी उपचार केले. ती पूर्णपणे बरी झाल्यावर, कासवांचे समुद्री मार्ग शोधण्यासाठी तिच्या पाठीवर सॅटेलाईट ट्रान्समिटर बसवून तिला समुद्रात मुक्त करण्यात आले. संशोधकांना वाटले होते की ती आसपासच्या परिसरातच फिरेल, पण धवललक्ष्मीने थेट आंतरराष्ट्रीय समुद्री सीमा ओलांडून ओमानचा किनारा गाठला आणि सर्वांनाच चकित केले.

का महत्त्वाचा आहे हा प्रवास?

१. समुद्री मार्गाचा शोध: ऑलिव्ह रिडले कासवं प्रजननासाठी नेमकी कुठे जातात, हे शोधण्यास मदत होईल.

२. सॅटेलाईट ट्रॅकिंग: पाठीवर बसवलेल्या ट्रान्समिटरमुळे तिच्या प्रवासाचा प्रत्येक टप्पा शास्त्रज्ञांना टिपता आला.

३. संवर्धनास मदत: या प्रवासामुळे अरबी समुद्रातील कासवांच्या स्थलांतराचे नवीन मार्ग समोर येत आहेत.