यल्लम्मा डोंगरावर वर्षभरात दासोह भवन उभारू

श्री रेणुका देवीच्या दर्शनावेळी मुख्यमंत्री सिद्धरामय्यांचे आश्वासन : विविध विकासकामांचे उद्घाटन

बेळगाव : सौंदत्ती यल्लम्मा डोंगर एक ऐतिहासिक पुराणकालीन मंदिर आहे. देवीच्या दर्शनासाठी येणाऱ्या लाखो भाविकांना निवास, पिण्याचे पाणी, शौचालय आदी सुविधा पुरविण्यात येतील, असे मुख्यमंत्री सिद्धरामय्या यांनी सांगितले. डोंगरावर रविवारी पर्यटन खात्याच्यावतीने 22 कोटी 45 लाख रुपये खर्चून उभारण्यात आलेली इमारत, निवासी इमारत, उद्यान व व्यापारी संकुल, अतिथीगृहाचे उद्घाटन करून ते बोलत होते. मुख्यमंत्री व उपमुख्यमंत्र्यांसह कार्यक्रमानिमित्त आलेल्या सर्व नेत्यांनी श्री रेणुकादेवीचे दर्शन घेतले. दर्शनानंतर रेणुका यल्लम्मा देवी प्राधिकारणाच्या बैठकीत त्यांनी भाग घेतला. त्यानंतर विविध विकासकामांचे लोकार्पण मुख्यमंत्र्यांच्या हस्ते झाले. यावेळी बोलताना सिद्धरामय्या पुढे म्हणाले, 1 हजार 87 एकर जमीन उपलब्ध असूनही आजवर पायाभूत सुविधा पुरविणे शक्य झाले नाही. या पवित्र ठिकाणाच्या विकासासाठी योजना तयार करण्यात आली आहे. डोंगरावर स्वच्छता राखण्याचे आवाहन करतानाच पुढील वर्षभरात दासोह भवन उभारण्यात येणार असल्याचे त्यांनी सांगितले.

यावेळी उपमुख्यमंत्री डी. के. शिवकुमार, पालकमंत्री सतीश जारकीहोळी, महिला व बालकल्याण खात्याच्या मंत्री लक्ष्मी हेब्बाळकर, पर्यटनमंत्री डॉ. एच. के. पाटील, परिवहनमंत्री रामलिंगा रेड्डी, आमदार विश्वास वैद्य यांच्यासह अनेक लोकप्रतिनिधी, जिल्ह्यातील अधिकारी उपस्थित होते. सौंदत्ती डोंगर यापुढे धार्मिक ठिकाण म्हणून विकसित होणारच. पण एक पर्यटनस्थळ म्हणूनही विकसित करण्यात येणार असल्याचे मुख्यमंत्र्यांनी सांगितले. यावेळी सौंदत्ती यल्लम्मा नगरपालिकेच्या अध्यक्षा चिन्नव्वा हुच्चन्नावर, उगरगोळ ग्रा. पं. अध्यक्ष मंजुनाथ काळप्पन्नावर, राज्य महिला विकास निगमच्या पुष्पलता एच., रेणुका यल्लम्मा विकास प्राधिकरणाचे सचिव एस. पी. बी. महेश आदी उपस्थित होते. मुख्यमंत्र्यांच्या दौऱ्याच्या पार्श्वभूमीवर डोंगरावर कडेकोट पोलीस बंदोबस्त तैनात करण्यात आला होता. दरवर्षी दीड ते दोन कोटी भाविक डोंगरावर दर्शनासाठी येतात. यामध्ये बहुतेकजण कष्टकरी वर्गातील भाविक असतात. त्यांना पायाभूत सुविधा पुरविण्यात येणार आहेत. यासाठी आराखडा तयार करण्याची सूचना करण्यात आली आहे.