दशावतारी कलावंत प्रशांत मेस्त्री काळाच्या पडद्याआड

दशावतारातील अनेक स्त्री भूमिका केल्या होत्या अजरामर

कणकवली / प्रतिनिधी
सिंधुदुर्ग जिल्ह्यातील प्रसिद्ध दशावतारी कलावंत व कणकवली तालुक्यातील हरकुळ खुर्द येथील प्रशांत रामचंद्र मेस्त्री (५०) यांचे शुक्रवारी निधन झाले. दशावतारामध्ये त्यांनी अनेक स्त्री भूमिका अजरामर केल्या होत्या. शुक्रवारी सकाळी हरकुळ खुर्द येथील घरी शॉक लागल्याने त्यांना तातडीने खाजगी दवाखान्यात आणण्यात आले. मात्र उपचारापूर्वीच त्यांचे निधन झाले होते. त्यांच्या पश्चात पत्नी, दोन मुलगे, एक मुलगी असा परिवार आहे. प्रशांत मेस्त्री यांच्या निधनामुळे दशावतारातील एक अभिनय संपन्न कलावंत काळाच्या पडद्याआड केल्याची भावना अनेक ज्येष्ठ दशावतार कलावंतांनी व्यक्त केली. प्रशांत मेस्त्री यांच्या द्रौपदी, कुंती, देवयानी, तारा, पार्वती अशा अनेक स्त्री भूमिका गाजल्या होत्या. लाजरी क्रिकेट ग्रुप कुडाळच्या मान्सून महोत्सवात द्रौपदी वस्त्रहरण मधील त्यांच्या 35 साड्या नेसण्याच्या अभिनय अजरामर झाला होता.