तणावामुळे क्रिप्टो गुंतवणूकदार दबावात

बिटकॉईन 4 टक्क्यांनी घसरली : इथेरियमही विक्रीच्या दबावात

वृत्तसंस्था/ नवी दिल्ली

इस्रायल आणि इराणमधील वाढत्या तणावादरम्यान, क्रिप्टोकरन्सी बाजारातही घसरण दिसून येत आहे. शुक्रवारी मोठ्या विक्रीमुळे बिटकॉइन आणि इतर लोकप्रिय क्रिप्टोकरन्सीमध्ये घसरण झाली. सकाळी 10:45 वाजता, क्रिप्टोकरन्सी बिटकॉइन 3 टक्क्यांनी घसरून 104,458 डॉलरवर पोहोचला.

मागील 24 तासांत जगातील सर्वात मोठ्या क्रिप्टोकरन्सी बिटकॉइनमध्ये 4 टक्केपेक्षा जास्त घसरण झाली आहे. दुसरीकडे, इथेरियम क्रिप्टोकरन्सीमध्येही शुक्रवारी 9 टक्केपेक्षा जास्त घसरण झाली आहे, ज्यामुळे त्याची किंमत 2512 डॉलर्सवर पोहोचली.

मुख्य कारण दोन्ही देशांमधील संघर्ष 

क्रिप्टोकरन्सी बाजारात विक्रीच्या दबावाचे मुख्य कारण म्हणजे इस्रायलने हवाई हल्ल्यांद्वारे इराणच्या अणु सुविधा तसेच त्याच्या लष्करी सुविधांवर हल्ला केल्याची बातमी होय. या हवाई हल्ल्यात इराणचे मोठे नुकसान झाल्याचा दावा केला जात आहे आणि त्यांच्या अनेक अणुशास्त्रज्ञांच्या मृत्यूची बातमी देखील आहे. या हल्ल्यानंतर संपूर्ण मध्य पूर्वेतील वातावरण तापले आहे.

इस्रायलच्या हल्ल्यात इराणचे रिव्होल्यूशनरी गार्ड कमांडर इशाय हुसेन सलामी यांचा मृत्यू झाल्याची पुष्टी झाली आहे. या हल्ल्यानंतर इस्रायलने आपल्या देशात आणीबाणी लागू केली आहे आणि देशाला कोणत्याही प्रकारचा हल्ला टाळण्यासाठी तयार राहण्यास सांगितले. दुसरीकडे, इराणने  प्रत्युत्तर म्हणून इस्रायलवर हल्ला केला.