बिजगर्णा येथे क्रिकेट स्पर्धेला प्रारंभ

वार्ताहर/किणये

बिजगर्णी येथील रॉयल चॅलेंज स्पोर्ट्स क्लब यांच्यावतीने आयोजित क्रिकेट स्पर्धेचे उद्घाटन मोठ्या उत्साहात पार पडले. कार्यक्रमाच्या अध्यक्षस्थानी माजी ग्राम पंचायत अध्यक्ष व विद्यमान सदस्य मनोहर बेळगावकर हे होते. माजी एपीएमसी अध्यक्ष निंगाप्पा जाधव यांच्या हस्ते स्पर्धेचे उद्घाटन करण्यात आले. मैदानाचे पूजन ग्रा. पं. सदस्य महेश पाटील यांच्या हस्ते करण्यात आले. ग्राम पंचायत अध्यक्ष रेखा नाईक, उपाध्यक्ष अॅड. नामदेव मोरे आदींच्या हस्ते दीप प्रज्वलन करण्यात आले. तसेच मंडळाच्यावतीने ग्राम पंचायत अध्यक्ष व उपाध्यक्ष यांचा विशेष सत्कारही करण्यात आला. सध्याच्या धावपळीच्या युगात व स्पर्धात्मक युगात साऱ्यांचेच व्यायामाकडे दुर्लक्ष झाले आहे. सुदृढ आरोग्यासाठी सर्वांनी रोज नियमित व्यायाम करावा तसेच क्रिकेट अथवा कोणताही एखादा खेळ रोज थोड्या प्रमाणात का होईना खेळला पाहिजे, असे मनोगत मनोहर बेळगावकर यांनी आपल्या भाषणातून व्यक्त केले. यावेळी अॅड. नामदेव मोरे व इतर मान्यवरांची भाषणे झाली. ग्राम पंचायत सदस्य संतोष कांबळे, शितल तारीहाळकर, सागर नाईक, चंद्रभागा जाधव, धनाजी कांबळे, कृष्णा जाधव, मोतीलाल जाधव, महादेव कांबळे आदी उपस्थित होते.