Solapur News | ऑपरेशन समन्वय अंतर्गत हातभट्ट्यांवर कारवाई
सोलापूर : ऑपरेशन समन्वय अंतर्गत सोलापूर जिल्ह्यात हातभट्टी निर्मिती व विक्रीचे मुख्य केंद्र असलेल्या मुळेगाव तांडा येथे एक्साईज, पोलीस, वन, महावितरण विभागाने संयुक्त धडक कारवाई करीत अनेक हातभट्ट्या उद्ध्वस्त करून लाखो रुपयांचा मुद्देमाल जप्त केला.
जिल्हाधिकारी एस. कार्तिकेयन यांनी सर्व विभागांना अवैध हातभट्टी निर्मिती व विक्री या विषयान्वये सर्व विभागांना समन्वयात्मक कठोर कारवाई करण्याचे निर्देश दिलेले होते. त्या निर्देशानुसार राज्य उत्पादन शुल्क विभागाचे पुणे विभागाचे उपायुक्त सागर धोमकर, अधीक्षक भाग्यश्री जाधव, उपअधीक्षक सौरभ अदाटे यांच्या मार्गदर्शनाखाली १९ जून रोजी राज्य उत्पादन शुल्क विभाग, सोलापूर वनविभाग, सोलापूर महावितरण विभाग, सोलापूर ग्रामीण पोलीस, महसूल विभाग या सर्व विभागांनी समन्वयाने हात भट्टी निर्मितीचे मुख्य केंद्र असलेल्या मुळेगांव तांडा येथील हातभट्ट्यांवर कारवाई केली.
यावेळी हातभट्टीसाठी साठवून ठेवलेल्या रसायनाचे पिंप जेसीबीच्या मदतीने नष्ट करण्यात येऊन रसायन हे नाल्याच्या पाण्यामध्ये टाकण्यात आले. तर पक्क्या बांधकामात बांधण्यात आलेले हौद पाडण्यात आले.
हातभट्टी निर्मिती केंद्रावर/अवैध देशी-विदेशी मद्य विक्री व वाहतुकीवर केलेल्या धडक कारवाईत एकूण ४२५० लि. रसायन असा मुद्देमाल जप्त करण्यात आला असून एकूण तीन गुन्हे नोंद करण्यात आले आहेत. तसेच एकूण तीन जणांवर कारवाई करुन एक लाख ६७ हजार ८५० रुपये किमतीचा मुद्देमाल जप्त करण्यात आला आहे.
या संयुक्त कारवाईमध्ये हातभट्ट्यांसाठी वापरल्या जाणाऱ्या मोठ्या प्रमाणात साठा करण्यात आलेले लाकूड व त्याच्या कटाईसाठी असणाऱ्या अनधिकृत सॉ मिल यांच्यावरही जप्तीची कारवाई सोलापूर वनविभाग यांनी केली.
.