वसुंधरा राजेंच्या बालेकिल्ल्यात काँग्रेसचा धडाका; झालावाड नगर परिषदेत भाजपचा पराभव

जयपूर: राजस्थानमधील स्थानिक स्वराज्य संस्थांच्या निवडणुकीच्या निकालांमध्ये सत्ताधारी भाजपला मोठा धक्का बसला आहे. माजी मुख्यमंत्री वसुंधरा राजे यांचा मजबूत राजकीय गड मानल्या जाणाऱ्या झालावाडमध्ये काँग्रेसने जोरदार मुसंडी मारत भाजपकडून सत्ता हिसकावून घेतली आहे. झालावाड नगर परिषदेत काँग्रेसने स्पष्ट बहुमत मिळवत भाजपला मोठा राजकीय धक्का दिला आहे.

झालावाड जिल्ह्यातील आठ स्थानिक स्वराज्य संस्थांपैकी चार ठिकाणी काँग्रेसला स्पष्ट बहुमत मिळाले आहे. झालावाड नगर परिषदेसह भवानी मंडी, खानपूर आणि डग येथे काँग्रेसने सत्ता मिळवली. दुसरीकडे भाजपला झालरापाटन, अकलेरा आणि मनोहरथाना या तीन ठिकाणी सत्ता कायम ठेवता आली. पिडावा नगरपालिकेत कोणत्याही पक्षाला स्पष्ट बहुमत मिळाले नसल्याने आम आदमी पक्षाची भूमिका महत्त्वाची ठरणार आहे.

४५ पैकी २९ जागा काँग्रेसच्या खात्यात

झालावाड नगर परिषदेच्या ४५ वॉर्डांमध्ये काँग्रेसने तब्बल २९ जागा जिंकून स्पष्ट बहुमत मिळवले. भाजपला १३ जागांवर समाधान मानावे लागले. आम आदमी पक्षाला एक आणि अपक्ष उमेदवारांना दोन जागा मिळाल्या. यापूर्वी या नगर परिषदेत भाजपची सत्ता होती. काँग्रेसच्या विजयामुळे ही सत्ता आता बदलली आहे.

झालावाड-बारां लोकसभा मतदारसंघ हा वसुंधरा राजे यांच्या राजकीय प्रभावाचा भाग मानला जातो. त्यांच्या कुटुंबाचा या परिसरात दीर्घकाळ राजकीय प्रभाव राहिला आहे. वसुंधरा राजे यांचे पुत्र दुष्यंत सिंह यांनीही या मतदारसंघाचे सलग पाच वेळा लोकसभेत प्रतिनिधित्व केले आहे.

झालरापाटनमध्ये भाजपचा दबदबा कायम

झालावाडमधील राजकीय चित्र मात्र सर्वच ठिकाणी काँग्रेसच्या बाजूने राहिलेले नाही. वसुंधरा राजे प्रतिनिधित्व करत असलेल्या झालरापाटन विधानसभा मतदारसंघातील नगरपालिकेत भाजपने मजबूत कामगिरी केली. २५ जागांपैकी भाजपने २२ जागा जिंकल्या, तर काँग्रेसला ८ आणि आम आदमी पक्षाला ५ जागा मिळाल्या.

अकलेरा नगरपालिकेतही भाजपने आघाडी राखत २५ जागा जिंकल्या. काँग्रेसला आठ, तर दोन जागा अपक्षांच्या खात्यात गेल्या. मनोहरथाना पालिकेत भाजपने २० पैकी ११ जागांवर विजय मिळवला. काँग्रेसला सहा आणि अपक्षांना तीन जागा मिळाल्या.

झालावाड नगर परिषदेत काँग्रेसने मिळवलेल्या स्पष्ट बहुमतामुळे वसुंधरा राजे यांच्या पारंपरिक प्रभावक्षेत्रात भाजपला धक्का बसल्याची चर्चा सुरू झाली आहे. मात्र, जिल्ह्यातील इतर स्थानिक संस्थांमधील भाजपची कामगिरी पाहता राजकीय समीकरण पूर्णपणे काँग्रेसच्या बाजूने झुकलेले नसल्याचेही स्पष्ट होते.