मुख्यमंत्री डॉ. प्रमोद सावंत उपचारानंतर परतले गोव्यात

प्रतिनिधी/ पणजी

गोव्याचे मुख्यमंत्री डॉ. प्रमोद सावंत पुण्यातील रुबी हॉल क्लिनिकमध्ये नियमित वैद्यकीय तपासणी आणि विश्रांतीनंतर काल, शनिवारी दुपारी गोव्यात सुखरूप परतले आहेत. त्यांच्या आगमनामुळे गेल्या दोन दिवसांपासून त्यांच्या प्रकृतीबाबत सुरू असलेल्या सर्व चर्चा आणि अफवांना आता पूर्णविराम मिळाला आहे.

काल, शनिवारी दुपारी विमानाने मुख्यमंत्री डॉ. सावंत हे दाबोळी विमानतळावर पोहचले. विमानतळावर उतरल्यानंतर ते अत्यंत उत्साही आणि प्रसन्न दिसत होते. तिथे उपस्थित असलेल्या प्रसारमाध्यमांशी संवाद साधताना त्यांनी स्मितहास्य करत आपण आता पूर्णपणे कामासाठी सज्ज असल्याचे संकेत दिले. विमानतळावर काही वरिष्ठ अधिकारी आणि मोजक्या कार्यकर्त्यांनी त्यांचे पुष्पगुच्छ देऊन स्वागत केले. विमानतळाबाहेर येताना त्यांनी कॅमेऱ्यासमोर हात उंचावून आपण पूर्णपणे बरे असल्याचे संकेत दिले. ते स्वत: चालत गाडीपर्यंत गेले, ज्यामुळे त्यांच्या प्रकृतीबाबतच्या सर्व शंका दूर झाल्या आहेत.

गोव्यात पोहोचल्यानंतर मुख्यमंत्र्यांनी राज्यातील जनतेचे आभार मानले. त्यांनी म्हटले की, “माझ्या प्रकृतीबद्दल चिंता व्यक्त करणाऱ्या आणि शुभेच्छा देणाऱ्या सर्व गोमंतकीय बांधवांचा मी आभारी आहे. माझी प्रकृती उत्तम असून मी आता पुन्हा एकदा जोमाने जनसेवेच्या कामात रुजू होत आहे. नागरिकांनी कोणत्याही चुकीच्या अफवांवर विश्वास ठेवू नये.”

दरम्यान, मुख्यमंत्री 19 मार्च रोजी अचानक पुणे दौऱ्यावर गेले होते, जिथे त्यांना ‘रुबी हॉल क्लिनिक‘मध्ये दाखल करण्यात आले होते. रुग्णालयाचे व्यवस्थापकीय संचालक डॉ. परवेझ ग्रांट यांनी अधिकृत माहिती देताना सांगितले की, मुख्यमंत्र्यांच्या सर्व वैद्यकीय चाचण्यांचे रिपोर्ट पूर्णपणे ‘नॉर्मल‘ आले आहेत. त्यांना केवळ अति कामामुळे थकवा जाणवत होता, ज्यासाठी त्यांना काही काळ विश्रांतीचा सल्ला देण्यात आला होता. काल, 20 मार्च रोजी संध्याकाळी त्यांना रुग्णालयातून डिस्चार्ज देण्यात आला होता.