रामलल्लाच्या दर्शन, आरतीच्या वेळेत बदल

दुपारी एक तासासाठी दर्शन बंद ठेवणार

वृत्तसंस्था/ अयोध्या

शरद ऋतूच्या आगमनासोबतच आता अयोध्येतील रामलल्लाच्या दर्शनाच्या वेळेत बदल करण्यात आला आहे. तसेच आरतीच्या वेळेतही बदल करण्यात आला आहे. आरती आणि भोगासाठी दुपारी एक तास मंदिराचे दरवाजे बंद ठेवण्याचा निर्णय कमिटीने घेतल्यानंतर त्याची अंमलबजावणी सुरू झाली आहे. 23 ऑक्टोबरपासून भक्तांना सकाळी 7 वाजल्यापासून राम मंदिरात रामलल्लाचे दर्शन घेता येत आहे. हे रात्री 9 वाजेपर्यंत सुरू राहते.

श्रीराम जन्मभूमी तीर्थ क्षेत्र ट्रस्टने रामलल्लाच्या दर्शनाचे नवीन वेळापत्रक जाहीर केले आहे. शरद ऋतू सुरू होत असल्यामुळे रामलल्लाच्या दर्शनाच्या वेळेत काही बदल करण्यात आले आहेत, असे राम मंदिराचे विश्वस्त डॉ. अनिल मिश्रा यांनी सांगितले. रामलल्लाची मंगलाआरती पूर्वी पहाटे 4 वाजता होत असे, ती आता पहाटे 4:30 वाजता होईल. याव्यतिरिक्त राम लल्लाची शृंगार आरती सकाळी 6 ऐवजी 6:30 वाजता होईल. आता दर्शन सकाळी 6:30 ऐवजी 7 वाजता सुरू होणार आहे. दुपारी 12 वाजता रामलल्लाला भोग दिला जातो. या काळात दुपारी 12 ते 1 वाजेपर्यंत दर्शन बंद राहणार आहे.

रामलल्लाची संध्याकाळची आरती संध्याकाळी 7 वाजता केली जाते. त्यानंतर, भाविक रात्री 9 वाजेपर्यंत दर्शन घेऊ शकतात. रात्री 9:30 वाजता शयन आरतीसह मंदिर बंद होते. शरद ऋतूमुळे रामलल्लाला अर्पण केलेल्या नैवेद्यांमध्येही बदल करण्यात आले आहेत. थंडीपासून बचाव करण्यासाठी त्यांना सकाळी कोमट पाण्याने स्नान घालण्यात येते. नैवेद्यांमध्ये सुक्यामेव्याचे प्रमाण वाढवण्यात आले आहे. थंडीची तीव्रता वाढत असताना रामलल्लाला रजाईने झाकून लोकरीचे कपडे घातले जातील, असेही विश्वस्त मंडळाकडून सांगण्यात आले.