आदर्शनगरमध्ये कारच्या काचा फोडल्या

बेळगाव : वडगाव परिसरात घरासमोर उभे करण्यात आलेल्या वाहनावर दगडफेक करण्यात आली आहे. रविवारी मध्यरात्री ही घटना घडली. एका कारच्या काचा फोडण्यात आल्या आहेत. या घटनेने परिसरात भीतीचे वातावरण पसरले आहे. आदर्शनगर परिसरात दगडफेकीची घटना घडली असून चोऱ्या, घरफोड्यांपाठोपाठ आता गुन्हेगारांनी घरासमोर उभ्या करण्यात आलेल्या वाहनांना आपले लक्ष्य बनविले आहे. यासंबंधी सोमवारी रात्री शहापूर पोलीस स्थानकाशी संपर्क साधला असता एफआयआर दाखल झाला नसल्याचे अधिकाऱ्यांनी सांगितले. बरीच प्रकरणे दाखल होण्याआधीच दडपण्यात येत आहेत. यापूर्वीही टिळकवाडी व शहापूर पोलीस स्थानकाच्या कार्यक्षेत्रात वाहनांवर दगडफेक करणे, घरासमोर उभी करण्यात आलेली वाहने पेटविण्याचे प्रकार घडले आहेत. असे प्रकार पुन्हा सुरू झाल्यामुळे नागरिकांत भीतीचे वातावरण पसरले आहे.