सालेली धबधब्याजवळ कारला भीषण आग; सुमारे पाच लाखांचे नुकसान

वाळपई: सत्तरी तालुक्यातील सालेली येथील धबधब्याजवळ आज दुपारी एका रिट्झ कारला अचानक भीषण आग लागल्याची घटना घडली. या आगीत कार पूर्णपणे जळून खाक झाली असून, सुमारे पाच लाख रुपयांचे नुकसान झाल्याचा प्राथमिक अंदाज अग्निशमन दलाने व्यक्त केला आहे. वाळपई अग्निशमन दलाच्या तत्पर कारवाईमुळे आग वेळीच आटोक्यात आणण्यात यश आले आणि मोठा अनर्थ टळला.

अग्निशमन दलाकडून मिळालेल्या माहितीनुसार, दुपारी 12.28 वाजता आग लागल्याची माहिती वाळपई अग्निशमन केंद्राला मिळाली. त्यानंतर स्टेशन अधिकारी ज्ञानेश्वर जी. गावस यांच्या नेतृत्वाखाली अग्निशमन दलाचे पथक तातडीने घटनास्थळी रवाना झाले.

आगीच्या भक्ष्यस्थानी पडलेली रिट्झ कार (नोंदणी क्रमांक GA-03-P-4077) काजुवाडा-कारापूर येथील मंजुना अम्माना भोवी यांच्या मालकीची असल्याची माहिती मिळाली आहे. धबधब्याजवळ कार उभी असताना तिच्या इंजिन विभागातून आग लागल्याचा प्राथमिक अंदाज व्यक्त करण्यात आला आहे. काही क्षणांतच आगीने संपूर्ण वाहनाला वेढा घातला.

अग्निशमन दलाने तातडीने आग विझविण्याचे काम सुरू केले. पथकाने तासाभराहून अधिक काळ अथक प्रयत्न करून आग पूर्णपणे आटोक्यात आणली. ही मोहीम दुपारी 1.55 वाजता पूर्ण झाल्याचे अग्निशमन दलाने सांगितले.

या कारवाईत स्टेशन अधिकारी ज्ञानेश्वर जी. गावस, चालक तुळशीदास एस. झारमेकर तसेच अग्निशमन जवान गंगाराम डी. पावणे, ज्ञानेश्वर एस. सावंत आणि आनंद ए. शेटकर यांनी सहभाग घेतला. अग्निशमन दलाच्या अंदाजानुसार, या घटनेत सुमारे पाच लाख रुपयांचे नुकसान झाले असून, सुमारे 50 हजार रुपयांची मालमत्ता वाचविण्यात यश आले.

सालेली धबधबा परिसरात पर्यटन हंगामात मोठ्या प्रमाणावर पर्यटकांची वर्दळ असते. अशा गर्दीच्या ठिकाणी वाहनाला आग लागल्यामुळे काही काळ परिसरात घबराटीचे वातावरण निर्माण झाले होते. सुदैवाने या घटनेत कोणतीही जीवितहानी झाली नाही.

दरम्यान, वाहनांना आग लागण्यामागे इंजिनमधील बिघाड, विद्युत शॉर्टसर्किट, इंधनगळती किंवा अतिउष्णता यांसारखी संभाव्य कारणे असू शकतात. वाहनचालकांनी नियमितपणे वाहनाची तपासणी करावी, वायरिंगची देखभाल करावी आणि अग्निसुरक्षेची योग्य ती काळजी घ्यावी, असे आवाहन अग्निशमन दलाच्या अधिकाऱ्यांनी केले आहे.