कार खरेदी वेगावर स्वार; वाहन पुरवठा 24 टक्क्यांनी मजबूत

जून 2026 मधील सियामच्या आकडेवारीमधून माहिती : प्रवासी वाहन पुरवठा तेजीत

वृत्तसंस्था, नवी दिल्ली

देशातील वाहन क्षेत्रासाठी जून 2026 हा महिना सकारात्मक राहिला आहे. देशांतर्गत बाजारपेठेत प्रवासी वाहने, दुचाकी आणि तीन-चाकी अशा तिन्ही श्रेणींमध्ये जोरदार मागणी दिसून आली. वाहन उत्पादकांची संघटना असलेल्या ‘सोसायटी ऑफ इंडियन ऑटोमोबाईल मॅन्युफॅक्चरर्स’ (सियाम) यांच्या ताज्या आकडेवारीनुसार, मागील वर्षाच्या तुलनेत जून 2026 मध्ये उत्पादकांकडून डीलरकडे पाठवल्या जाणाऱ्या वाहनांच्या संख्येत (डिस्पॅच) लक्षणीय वाढ झाली आहे.

प्रवासी वाहनांच्या पुरवठ्यात 24.1 टक्क्यांनी वाढ

सियामच्या माहितीनुसार, जून 2026 मध्ये कंपन्यांनी डीलरकडे 3,88,144 प्रवासी वाहने पाठवली. हा आकडा जून 2025 मधील 3,12,851 वाहनांच्या तुलनेत 24.1 टक्क्यांनी अधिक आहे. ही वाढ दर्शवते की बाजारपेठेत कारची मागणी अजूनही भक्कम आहे आणि कंपन्या डीलर नेटवर्कमध्ये पुरेसा साठा उपलब्ध असल्याची खात्री करत आहेत.

दुचाकी विभागात दमदार कामगिरी

जून महिन्यात दुचाकींच्या विक्रीतही लक्षणीय वाढ झाली. गेल्या महिन्यात एकूण 18,51,400 दुचाकींची विक्री झाली, जी जून 2025 मध्ये 15,61,283 इतकी होती. अशा प्रकारे, दुचाकींच्या विक्रीत 18.6 टक्क्यांची वार्षिक वाढ नोंदवली गेली. ग्रामीण आणि शहरी अशा दोन्ही बाजारपेठांमधील वाढत्या मागणीमुळे याविभागाला बळकटी मिळाली आहे.

तीन-चाकी वाहनांच्या श्रेणीतील कामगिरीही प्रभावी होती. जून 2026 मध्ये कंपन्यांनी डीलरकडे 77,951 तीन-चाकी वाहने पाठवली; याउलट, मागील वर्षी याच महिन्यात हा आकडा 61,828 इतका होता. म्हणजेच, या श्रेणीत 26.1 टक्क्यांची वार्षिक वाढ झाली आहे.