Tehsildar Rakesh Gidde | केज तहसीलदार राकेश गिड्डे यांचा भीषण अपघातात मृत्यू

                                              रेणापूर फाट्याजवळ भीषण अपघात

खंडेराजुरी - केज तालुक्याचे तहसीलदार राकेश गिड्डे यांचे गुरुवारी सकाळी लातूर-अंबाजोगाई महामार्गावरील रेणापूर फाट्याजवळ झालेल्या भीषण कार अपघातात निधन झाले. राकेश गिड्डे हे स्वतःच्या कारने प्रवास करत असताना त्यांच्या वाहनाचा अपघात झाला. प्राथमिक माहितीनुसार, कारमध्ये ते एकटेच होते आणि गाडी वेगात असताना अचानक नियंत्रण सुटून पलटी झाल्याने हा अपघात घडल्याचा अंदाज रेणापूर पोलिसांनी वर्तविला आहे.

अपघाताची तीव्रता इतकी मोठी होती की यामध्ये त्यांचा जागीच मृत्यू झाला. घटनेची माहिती मिळताच स्थानिक पोलिसांनी तातडीने धाव घेऊन त्यांचा मृतदेह उत्तरीय तपासणीसाठी रेणापूर येथील ग्रामीण रुग्णालयात दाखल केला आहे. एका कार्यक्षम आणि तरुण अधिकाऱ्याच्या अशा अचानक जाण्याने महसूल प्रशासनासह संपूर्ण केज तालुक्यावर मोठी शोककळा पसरली असून पोलीस या प्रकरणाचा तपास करत आहेत.

याबाबत एरंडोली गावात अधिक माहिती घेतली असता ते कायम ड्रायव्हरसह प्रवास करत असत. त्यांचा अपघात का घातपात याबाबत गावात चर्चेला उधान आले आहे. ते मनमिळावू व सामाजिक कार्यात सातत्याने अग्रेसर असत.त्यांच्या निधनाने गावात शोककळा पसरले आहे.