ज्ञानपीठ पुरस्कार विजेते एम. टी. वासुदेवन यांच्या घरी चोरी

कोझीकोड : केरळचे प्रसिद्ध लेखक आणि ज्ञानपीठ पुरस्कार विजेते एम. टी. वासुदेवन यांच्या घरी चोरी झाली असून लक्षावधी रुपयांचे दागिने आणि रोख रक्कम चोरण्यात आली आहे. वासुदेवन यांच्या पत्नीने सादर केलेल्या तक्रारीनुसार एफआयआर नोंदवून घेण्यात आला असून पोलिसांनी तपासाला प्रारंभ केला आहे. लेखकाच्या घरातून शुद्ध सोन्याची 26 नाणी आणि सोन्याचे तसेच हिऱ्यांचे अनेक दागिने चोरीला गेल्याचे तक्रारीत स्पष्ट करण्यात आले आहे. सोन्याच्या साखळ्या, बांगड्या आणि इतर मौल्यवान वस्तूही लांबविण्यात आल्या आहेत, अशी माहिती देण्यात आली आहे. वासुदेवन 91 वर्षांचे असून ते त्यांची पत्नी आणि अन्य काही नातेवाईकांसह या घरात रहात आहेत, अशी माहितीही देण्यात आली आहे.