बोपन्ना-एब्डन यांना सहावे मानांकन

वृत्तसंस्था / ट्यूरीन (इटली)

येथे होणाऱ्या एटीपी टूरवरील फायनल्स टेनिस स्पर्धेत भारताच्या रोहन बोपन्ना आणि त्याचा ऑस्ट्रेलियन साथीदार मॅथ्यू एब्डन या जोडीला दुहेरीच्या मानांकनात सहावे स्थान देण्यात आले असून या जोडीचा बॉब ब्रायन गटात समावेश करण्यात आला आहे.

या स्पर्धेत बोपन्ना आणि एब्डन यांचा पुरुष दुहेरीतील सलामीचा सामना येत्या सोमवारी इटलीच्या बोलेली आणि व्हेव्हासोरी बरोबर होणार आहे. 2024 च्या टेनिस हंगामातील एटीपी टूरवरील ही शेवटची स्पर्धा आहे. सदर स्पर्धा 11 ते 17 नोव्हेंबर दरम्यान खेळविली जाईल. पुरुष एकेरीत मानांकनातील पहिले आठ टेनिसपटू तर पुरुष दुहेरीत मानांकनातील पहिल्या 8 जोड्यांचा या स्पर्धेत समावेश राहिल. बॉब ब्रायन गटामध्ये जर्मनीचा केव्हिन क्रेव्हेज आणि टीम प्युझ त्याचप्रमाणे क्रोएशियाच्या सालव्हाडोरियन आणि पेव्हिक यांचा समावेश आहे. पुरुष दुहेरीत दुसऱ्या गटाला माईक ब्रायन असे नामकरण करण्यात आले आहे. या दोन गटातील आघाडीच्या पहिल्या दोन जोड्या उपांत्य फेरीसाठी पात्र ठरतील.