बिहारमध्ये 21 मजुरांसह बोट उलटली

वृत्तसंस्था/ पाटणा

बिहारमधील भागलपूर येथे 21 मजुरांना घेऊन जाणारी एक बोट बुधवारी उलटली. हे मजूर गंगा नदीच्या काठावर वाळूच्या पिशव्या टाकत होते. याचदरम्यान अचानक एक बाजू खूप जड झाल्यामुळे बोट उलटून गंगेत बुडाली. बोट कलंडताच सर्व मजूर नदीत पडले. बचाव पथकांनी 20 मजुरांना सुखरूप बाहेर काढले आहे. एक मजूर अद्याप बेपत्ता असून त्याचा शोध सुरू आहे. राज्यात मुसळधार पावसाचे सत्र सुरू असतानाच ही दुर्घटना घडली आहे. बिहारप्रमाणेच उत्तर प्रदेशात सुरू असलेल्या मान्सूनच्या पावसामुळे नद्यांना पूर आला आहे. चंदौलीमधील मुसाखंड आणि लतीफशाह धरणे ओसंडून वाहत असल्याने त्यांचे दरवाजे उघडण्यात आले आहेत. लखीमपूरमधील शारदा नदीवरील तमोलिन पुरवा धरणाचा एक भाग फुटला आहे. दरम्यान, महोबा येथील जिल्हा रुग्णालयात पाणी शिरले असून, आपत्कालीन कक्षाच्या छतातून पाणी गळू लागले आहे. मध्य प्रदेशच्या पूर्व भागानंतर, आता मान्सून उत्तर, पश्चिम आणि मध्य भागांमध्ये सक्रिय होईल. हवामान विभागाने भोपाळ, उज्जैन, सागर, ग्वाल्हेर आणि चंबळ विभागातील 21 जिह्यांसाठी पुढील दोन दिवसांकरिता ऑरेंज अलर्ट जारी केला आहे.