सावंतवाडीत उद्या रक्तदान शिबिर

ओटवणे: राष्ट्रीय स्वैच्छिक रक्तदान दिनाचे औचित्य साधून ‘ऑन कॉल रक्तदाते’ संस्थेच्या वतीने गुरुवार, १ ऑक्टोबर रोजी सावंतवाडी उपजिल्हा रुग्णालयात रक्तदान शिबिराचे आयोजन करण्यात आले आहे. इच्छुक रक्तदात्यांनी मोठ्या संख्येने सहभागी होऊन रक्तदान करावे, असे आवाहन संस्थेच्या वतीने करण्यात आले आहे.

भारतामध्ये दरवर्षी १ ऑक्टोबर रोजी राष्ट्रीय स्वैच्छिक रक्तदान दिन साजरा केला जातो. १ ऑक्टोबर १९७५ रोजी भारतीय रक्तसंक्रमण व रोगप्रतिकारक-रक्तविज्ञान सोसायटीच्या पुढाकारातून या दिनाची सुरुवात झाली. यंदाच्या रक्तदान दिनाची संकल्पना ‘मानवतेचा एक थेंब – रक्तदान करा, जीवन वाचवा’ अशी आहे.

रक्ताला कोणताही कृत्रिम पर्याय उपलब्ध नसल्याने गरजू रुग्णांसाठी रक्तदानाला विशेष महत्त्व आहे. रक्तदानातून मिळालेल्या एका युनिट रक्ताचा विविध रक्तघटकांच्या माध्यमातून एकापेक्षा अधिक रुग्णांना उपयोग होऊ शकतो. त्यामुळे स्वैच्छिक रक्तदान ही मानवतेची महत्त्वपूर्ण सेवा मानली जाते.

सध्या विविध रक्तपेढ्यांमध्ये काही रक्तगटांचा तुटवडा जाणवत आहे. सावंतवाडी रक्तपेढीतही ए पॉझिटिव्ह आणि ओ पॉझिटिव्ह या रक्तगटांच्या साठ्याची कमतरता असल्याचे सांगण्यात आले आहे. त्यामुळे या रक्तगटांसह इतर रक्तगटांच्या इच्छुक रक्तदात्यांनीही शिबिरात सहभागी होऊन रक्तदान करावे, असे आवाहन करण्यात आले आहे.

रक्तदान करण्यास पात्र असलेल्या नागरिकांनी १ ऑक्टोबर रोजी सावंतवाडी उपजिल्हा रुग्णालयातील रक्तपेढीत उपस्थित राहून या उपक्रमात सहभागी व्हावे. एका रक्तदानामुळे गरजू रुग्णाला वेळेवर रक्त उपलब्ध होण्यास मदत होऊ शकते.