भाजपच्या नगराध्यक्षपदाच्या उमेदवार श्रद्धाराजे भोंसले
जनसेवा-विकासासाठी लढणार ; भाजप युवानेते विशाल परब यांचा विश्वास
सावंतवाडी । प्रतिनिधी
भारतीय जनता पक्षामध्ये शिस्तीला अत्यंत महत्त्व आहे. पक्षाने दिलेला उमेदवार सामान्य कुटुंबातील असो वा राजघराण्यातील, भाजपमध्ये शिस्तीला महत्व असून पक्षाचा शब्द खाली पडू दिला जात नाही, असे स्पष्ट मत भाजपचे युवा नेते विशाल परब यांनी व्यक्त केले. श्रद्धाराजे भोंसले या भाजपच्या नगराध्यक्षपदाच्या उमेदवार असतील, असे त्यांनी यावेळी जाहीर केले. आमचे उमेदवार जनतेच्या सेवेसाठी कार्यरत असून, सावंतवाडीच्या विकासासाठी मेहनत घेणारे आहेत, असा विश्वास परब यांनी व्यक्त केला.नगराध्यक्ष तसेच नगरसेवक पदासाठी भाजपने एकूण १५ जणांचे अर्ज दाखल केले आहेत. जगात, देशात, राज्यात आणि कोकणात भाजप नंबर वन होती, आहे आणि राहणार, असा विश्वास परब यांनी व्यक्त केला. अनेक वर्षांपासून विरोधी मंडळी सत्तेवर होती, परंतु आता माझ्यासारख्या कार्यकर्त्याला आणि उमेदवारांना सावंतवाडीकर आशीर्वाद देतील. पंतप्रधान नरेंद्र मोदी, मुख्यमंत्री देवेंद्र फडणवीस, प्रदेशाध्यक्ष रविंद्र चव्हाण, खासदार नारायण राणे, पालकमंत्री नितेश राणे यांच्या नेतृत्वाखाली आम्ही ही निवडणूक लढणार आहोत. त्यामुळे ३ डिसेंबरला गुलाल हा भाजपचाच असेल, असा ठाम विश्वास त्यांनी व्यक्त केला.
विकास आणि समस्या निवारणावर भर
सावंतवाडीचा विकास आणि शहराचा कायापालट करण्यासाठी आम्ही लढणार आहोत. हॉस्पिटल आणि रोजगाराचा प्रश्न घेऊन आम्ही निवडणुकीला सामोरे जात आहोत. त्यामुळे या समस्या सोडविण्यासाठी सावंतवाडीमध्ये भाजपची सत्ता असणे आवश्यक आहे. येथील जनता सुज्ञ आणि सुशिक्षित आहे. ते आमच्या सुज्ञ व सुशिक्षित उमेदवारांना निश्चितच विजयी करतील, असा विश्वास त्यांनी व्यक्त केला. मी स्वतः घरोघरी जाऊन लोकांना विनंती करणार आहे आणि निकाल आमच्या बाजूनेच लागेल, असेही त्यांनी सांगितले. बिहारच्या निवडणुकीत जनतेने भाजपवर विश्वास दाखवला आहे नगरपरिषद निवडणुकीतही जनता भाजपवर विश्वास दाखवेल असा आशावाद परब यांनी व्यक्त केलानारायण राणे यांच्या टीकेबाबत विचारले असता विशाल परब म्हणाले, "नारायण राणे वडीलधारी आहेत. एवढ्या मोठ्या माणसांसमोर बोलण्याएवढा मी मोठा नाही. तुमच्या प्रश्नावर 'नो कमेंट्स'." यावेळी नगराध्यक्षपदाचे उमेदवार युवराज्ञी श्रद्धाराजे भोंसले, युवराज लखमराजे भोंसले, सौ. वेदीका परब, शहराध्यक्ष सुधीर आडिवरेकर मनोज नाईक यांच्यासह अनेक भाजप पदाधिकारी उपस्थित होते.