आता बाईक-स्कूटरला अँटी-लॉक ब्रेकिंग सुविधा

1 जानेवारीपासून ही सुविधा होणार सुरु

नवी दिल्ली : केंद्र सरकारने 1 जानेवारीपासून भारतात उत्पादित होणाऱ्या एंट्री-लेव्हल दुचाकी वाहनांमध्ये अँटी-लॉक ब्रेकिंग सिस्टम (एबीएस) अनिवार्य केले आहे. त्यात इलेक्ट्रिक बाईक आणि स्कूटरचाही समावेश आहे. हे वैशिष्ट्या अचानक ब्रेकिंग करताना वाहन घसरण्यापासून रोखते. रस्ते वाहतूक आणि महामार्ग मंत्रालयाने (एमओआरटीएच) एक अधिसूचना जारी केली आहे, ज्यामध्ये ऑटोमेकर्सना एल2 श्रेणीतील दुचाकी वाहनांमध्ये एबीएस प्रदान करावे लागेल असे म्हटले आहे. यापूर्वी हा नियम 125 सीसी इंजिन आणि त्याहून अधिक क्षमता असलेल्या दुचाकी वाहनांसाठी आवश्यक होता. दरम्यान, 50 सीसी मोटर आणि 50 किमी प्रतितास पेक्षा कमी वेग असलेल्या इलेक्ट्रिक वाहनांना सूट देण्यात आली आहे. इतकेच नाही तर डीलरला प्रत्येक दुचाकी वाहनासोबत दोन बीआयएस-प्रमाणित हेल्मेट (एक स्वारासाठी आणि एक मागील सीटसाठी) देखील पुरवावे लागतील.

काय आहे ही सुविधा

• अँटी-लॉक ब्रेकिंग सिस्टम (एबीएस) हे एक असे तंत्रज्ञान आहे जे अचानक ब्रेक लावताना बाईक किंवा स्कूटरची चाके लॉक होण्यापासून रोखते.
• यामध्ये जर खूप जोरात ब्रेक लावला तर एबीएस नसलेल्या बाईकचे चाक लॉक होऊ शकते, ज्यामुळे बाईक घसरते आणि अपघात होऊ शकतो.
• या परिस्थितीत एबीएस वारंवार ब्रेक चालू आणि बंद करते, जेणेकरून चाक लॉक होत नाही आणि तुम्ही बाईक नियंत्रित करू शकता. अभ्यासानुसार, एबीएस अपघातांची शक्यता 35-45 टक्क्यांनी कमी करू शकते.
• प्राइमस पार्टनर्सचे उपाध्यक्ष निखिल ढाका यांच्या मते, एबीएस अनिवार्य केल्याने उत्पादन डिझाइन आणि उत्पादन दोन्ही क्षेत्रात कंपन्यांसाठी मोठे बदल होतील.