बिगबास्केटचे सीईओ हरी मेनन यांचा राजीनामा

अॅमेझॉनचे अमित नंदा होणार नवे सीईओ

वृत्तसंस्था/नवी दिल्ली

टाटाच्या मालकीच्या ऑनलाइन किराणा प्लॅटफॉर्म बिगबास्केटचे सह-संस्थापक हरी मेनन यांनी मुख्य कार्यकारी अधिकारी (सीईओ) पदाचा राजीनामा दिला आहे. कंपनीने 16 जून रोजी याची अधिकृत घोषणा केली. ई-कॉमर्स क्षेत्रातील दिग्गज अॅमेझॉनमध्ये 11 वर्षांहून अधिक काळ काम केलेले अमित नंदा आता बिगबास्केटचे नवीन सीईओ म्हणून पदभार स्वीकारणार आहेत.

सह-संस्थापक हरी मेनन संचालक मंडळावर कायम राहणार

बिगबास्केटमधील या मोठ्या नेतृत्व बदलानंतरही, कंपनीचे सह-संस्थापक हरी मेनन आणि विपुल पारेख कंपनी पूर्णपणे सोडणार नाहीत. ते दोघेही कंपनीच्या संचालक मंडळावर कायम राहतील. यासोबतच, ते नवीन नेतृत्व आणि नेतृत्व संघांना मार्गदर्शन करणे सुरूच ठेवतील. बिगबास्केटच्या सर्वोच्च नेतृत्वातील हा बदल अशा वेळी झाला आहे, जेव्हा भारतीय बाजारपेठेत क्विक कॉमर्सची स्पर्धा तीव्र झाली आहे.सध्या ब्लिंकइट, स्विगी, इंस्टामार्ट, झेप्टो, फ्लिपकार्ट मिनिट्स आणि अॅमेझॉन नाऊ हे बाजारपेठेतील हिस्सेदारीसाठी स्पर्धा करत आहेत.

अॅमेझॉनमधून अमित नंदा यांचे येणे का खास आहे?

अमित नंदा हे अॅमेझॉनमध्ये ‘डायरेक्टर ऑफ सेलिंग पार्टनर सर्व्हिसेस“ या पदावर होते. त्यांनी अॅमेझॉन सोडून बिगबास्केटमध्ये सामील होण्याचा निर्णय अत्यंत महत्त्वाच्या वेळी घेतला आहे. अॅमेझॉन स्वत: सध्या क्विक-कॉमर्स कंपन्यांना आव्हान देण्यासाठी सज्ज होत आहे.

अमित नंदा यांचे स्वागत

राजीनाम्याच्या घोषणेसोबतच, हरी मेनन म्हणाले की, बिगबास्केटला सुरुवातीपासून देशातील सर्वात विश्वासार्ह ग्राहक प्लॅटफॉर्मपैकी एक बनवल्यानंतर, अमित नंदा यांचे सीईओ म्हणून स्वागत करताना आनंद होत आहे. अमित यांची ग्राहकांची सखोल जाण, व्यवसाय वाढवण्याचा उत्कृष्ट ट्रॅक रेकॉर्ड आणि ई-कॉमर्स क्षेत्रातील व्यापक अनुभव कंपनीला पुढे नेण्यास मदत करेल.

-हरी मेनन

आम्ही विकासाच्या मोठ्या संधी शोधू

अमित नंदा यांनी बिगबास्केटमध्ये सामील होण्याबद्दल आपला उत्साह व्यक्त केला आणि म्हणाले की, बिगबास्केटचे ‘ग्राहक-प्रथम“ मूल्य आणि टाटा समूहाचा वारसा भविष्यासाठी एक मजबूत पाया तयार करतात. ते हरी आणि त्यांच्या टीमने तयार केलेल्या प्रायव्हेट लेबल्सचे मोठे चाहते आहेत. ते कंपनीची दूरदृष्टी पुढे नेण्यासाठी आणि विकासाच्या मोठ्या संधी मिळवण्यासाठी संपूर्ण नेतृत्व टीमसोबत काम करतील.

-अमित नंदा