केंद्र सरकारकडून रुग्णांना मोठा दिलासा

42 अत्यावश्यक औषधांच्या किरकोळ किमती निश्चित : अँटीबायोटिक्स, संसर्गावरील औषधांचा समावेश

वृत्तसंस्था/ नवी दिल्ली

केंद्र सरकारने महागड्या औषधांपासून दिलासा देण्यासाठी मोठे पाऊल उचलले आहे. केंद्राने आता अनेक अत्यावश्यक औषधांच्या किरकोळ किमती निश्चित केल्यामुळे रुग्णांना रुग्णालये आणि फार्मसीमधील अनावश्यक खर्चापासून दिलासा मिळणार आहे. राष्ट्रीय औषध किंमत प्राधिकरणाने या दिशेने स्पष्ट आदेश जारी करत सर्व उत्पादक आणि वितरकांनी निश्चित किमतींची यादी सरकार, राज्य औषध नियंत्रक आणि डीलर्सना सादर करावी, असे निर्देश दिले आहेत.

केंद्र सरकारने 42 सामान्य औषधांच्या किरकोळ किमती निश्चित केल्या आहेत. यामध्ये ब्रॉड-स्पेक्ट्रम अँटीबायोटिक्स आणि इप्का प्रयोगशाळांचा समावेश आहे. प्रत्यक्षात, अवयव प्रत्यारोपणानंतर ही औषधे सामान्यत: वापरली जातात. या निर्णयामुळे महागड्या औषधांवर रुग्णांना दिलासा मिळण्यासोबतच औषध दुकानांमध्ये अन्याय्य नफेखोरीवरही बंदी घातली जाईल, असा विश्वास व्यक्त केला जात आहे.

सरकारने घेतलेल्या नव्या निर्णयानुसार आता मेरोपेनेम आणि सल्बॅक्टम इंजेक्शनची किरकोळ किंमत प्रतिकुपी 1,938.59 रुपये आहे. याशिवाय, मायकोफेनोलेट मोफेटिलची किंमत प्रतिटॅब्लेट 131.58 रुपये आहे. बॅक्टेरियाच्या संसर्गावर उपचार करण्यासाठी वापरल्या जाणाऱ्या अॅबॉट हेल्थकेअरच्या क्लॅरिथ्रोमाइसिन एक्सटेंडेड-रिलीज टॅब्लेटची किंमत आता प्रतिटॅब्लेट 71.71 रुपये आहे.

यावर्षी फेब्रुवारीमध्येच राष्ट्रीय औषध किंमत प्राधिकरणाने (एनपीपीए) एक आदेश जारी केला होता. या आदेशात सर्व उत्पादकांनी निश्चित किमतींची यादी डीलर्स, राज्य औषध नियंत्रक आणि सरकारला सादर करावी, असे बजावले होते. त्याचवेळी, यासंदर्भात एका अधिकाऱ्याने सांगितले की फार्मसी औषधे एनपीपीएने निश्चित केलेल्या किमतीवर विकली जात आहेत की नाही हे सामान्य नागरिकाला तपासण्यासाठी किंमत यादी प्रदर्शित करण्याचा आदेशही देण्यात आल्याचे एका अधिकाऱ्याने सांगितले. प्रत्येक किरकोळ विक्रेता आणि डीलरला किंमत यादी आणि पूरक यादी सार्वजनिक ठिकाणी लावावी लागेल. ही यादी स्पष्ट आणि सहज दिसणाऱ्या ठिकाणी असावी, असे एनपीपीएने आदेशात म्हटले आहे.