भावना बेरडेला दोन पदके

बेळगाव : हासन येथे विद्याभारती अखिल भारतीय शिक्षण संस्था पुरस्कृत 36 व्या विद्याभारती राष्ट्रीय अॅथलेटिक स्पर्धेत दक्षिण मध्यक्षेत्राचे प्रतिनिधित्व करताना संत मीरा अनगोळच्या भावना भाऊ बेरडेने रौप्य व कांस्य दोन पदके मिळवून उल्लेखनीय कामगिरी केली. जिल्हा क्रीडांगणावर झालेल्या स्पर्धेत 17 वर्षाखालील मुलींच्या गटात लांबउडीत भावना बेरडेने 4.69 मी. अंतर नोंदवित कांस्यपदक मिळविले. तर तिहेरी उडीत भावना बेरडेने 9.78 इतकी उडी मारून रौप्यपदक पटकाविले आहे. स्कूल गेम्स फेडरेशन ऑफ इंडियाचे सदस्य मुखतेश बदेशा, परमेश्वर हेगडे, माधव पुणेकर, चंद्रराज यांच्या हस्ते पदक प्रमाणपत्र देऊन गौरविण्यात आले. भावनाला क्रीडाशिक्षक सी, आर. पाटील, शिवकुमार सुतार, अनुराधा पुरी यांचे मार्गदर्शन व प्रोत्साहन लाभत आहे.