डॉ. किरण ठाकुर यांच्यावर शुभेच्छांचा वर्षाव!

72 व्या वाढदिवसानिमित्त पुण्यात विविध क्षेत्रातील मान्यवरांकडून अभीष्टचिंतन : अन्य मान्यवरांचा ‘लोकगौरव पुरस्कारा’ने सन्मान

पुणे : ‘तरुण भारत’चे सल्लागार संपादक व ‘लोकमान्य मल्टिपर्पज को-ऑप. सोसायटी लि.’चे संस्थापक-अध्यक्ष डॉ. किरण ठाकुर यांचे 72 व्या वाढदिवसानिमित्त विविध क्षेत्रातील मान्यवरांसह पुणेकरांकडून रविवारी अभीष्टचिंतन करण्यात आले. डॉ. ठाकुर यांच्या जन्मदिवसानिमित्त पुणेकरांकडून दिवसभर त्यांच्यावर शुभेच्छांचा वर्षाव सुरू होता. डॉ. ठाकुर यांच्या वाढदिवसानिमित्त पुण्यातील पंडित फार्म येथे कृतज्ञता सोहळ्याचे आयोजन करण्यात आले. या सोहळ्याला पुणेकरांनी मोठ्या संख्येने हजेरी लावत त्यांना प्रत्यक्ष भेटून शुभेच्छा दिल्या. प्रारंभी संस्कृतचे गाढे अभ्यासक पंडित वसंतराव गाडगीळ व त्यांच्या साधकांनी मंत्रोच्चाराने त्यांचे औक्षण केले. आमदार माधुरी मिसाळ, उपमुख्यमंत्री देवेंद्र फडणवीस यांचे बंधू प्रसेनजित फडणवीस, शैलेश टिळक, एस. एम. जोशी फौंडेशनचे सुभाष वारे यांच्यासह विविध मान्यवरांनी त्यांचे अभीष्टचिंतन केले. यावेळी ‘लोकमान्य’च्यावतीने सजग नागरिक मंचाचे विवेक वेलणकर, सहकारतज्ञ विद्याधर अनास्कर, सहकार विभागाचे माजी अधिकारी दिनेश ओऊळकर, बुलढाणा अर्बनचे सीईओ शिरीष देशपांडे, ज्येष्ठ निवेदक सुधीर गाडगीळ, चित्रकार शेखर साने, निवेदिता एकबोटे, डॉ. सतीश देसाई, ‘लोकमत’चे संपादक विजय बाविस्कर, ‘सकाळ’चे संपादक सम्राट फडणीस, ‘आज का आनंद’चे संपादक आनंद अगरवाल यांच्यासह अन्य मान्यवरांचा ‘लोकगौरव पुरस्कारा’ने सन्मान करण्यात आला. प्रास्ताविकात बोलताना ‘लोकमान्य’च्या पुणे विभागाचे क्षेत्रीय व्यवस्थापक सुशील जाधव म्हणाले, की किरण ठाकुर अर्थात मामा यांनी लावलेल्या छोट्या रोपट्याचे आता वटवृक्षात ऊपांतर झाले आहे. आज ‘लोकमान्य’ हा सहकार क्षेत्रातील मोठा ब्रँड झाला आहे. पुण्याशी मामांचे वेगळे ऋणानुबंध असून, येथे त्यांचा मोठा मित्र परिवार आहे. पुण्यावर त्यांचे विशेष प्रेम असून, आज त्याचीच प्रचिती बघायला मिळत आहे. मामांचे नेतृत्व व ‘लोकमान्य टीम’ची साथ यामुळे सहकार क्षेत्रात आज ‘लोकमान्य’ने भरारी घेतली आहे.

गोव्याच्या मुख्यमंत्र्यांचा शुभेच्छा संदेश

दरम्यान, गोव्याचे मुख्यमंत्री डॉ.प्रमोद सावंत यांनी डॉ. किरण ठाकुर यांच्या 72 व्या वाढदिवसानिमित्त व्हिडिओ संदेश पाठवत त्यांचे अभीष्टचिंतन केले. गोव्यातील जनता व सरकारच्यावतीने मी त्यांना शुभेच्छा देतो. गोव्यात सर्व जण त्यांना मामा ठाकुर या नावाने ओळखतात. तरुण भारत व लोकमान्यच्या माध्यमातून पत्रकारिता, सहकार,  सामाजिक आदी क्षेत्रात त्यांनी महत्त्वपूर्ण कार्य केले आहे. पुढील कार्यासाठीही मी त्यांना शुभेच्छा देतो.