बंगाल-मुम्बा कबड्डी सामना टाय

दबंग दिल्लीची तेलगु टायटन्सवर मात

वृत्तसंस्था/हैदराबाद

2024 च्या प्रो-कबड्डी लीग स्पर्धेतील येथे झालेला बंगाल वॉरियर्स आणि यु मुम्बा यांच्यातील थरारक सामना अखेर टाय (बरोबरीत) राहिला. या दोन्ही संघांनी 31-31 असे समान गुण नोंदविले. दुसऱ्या एका सामन्यात दबंग दिल्लीने तेलगु टायटन्सवर मात केली. बंगाल वॉरियर्स आणि यु मुम्बा यांच्यातील सामना शेवटच्या क्षणापर्यंत अटीतटीचा झाला. बंगाल वॉरियर्सच्या मनिंदर सिंगने दर्जेदार खेळ करत यु मुम्बा समोर अनेक अडचणी निर्माण केल्या. पण मनजित सिंगने मनिंदर सिंगला चोख प्रत्युत्तर दिल्याने हे दोन्ही संघ समान दर्जेदार असल्याचे जाणवले. या दोन्ही संघांनी आक्रमक चढाया आणि भक्कम बचाव तंत्रावर अधिक भर दिला. बंगाल वॉरियर्सतर्फे फझल अत्राचेली, मनिंदर सिंग आणि सुशिल कांबरेकर यांनी सामन्यांच्या पूर्वार्ध्यात आपल्या चढायांवर पहिल्या 10 मिनिटांच्या कालावधीत आपल्या संघाला एका गुणाची आघाडी मिळवून दिली होती. पण त्यानंतर यु मुम्बाच्या खेळाडुंनी सलग गुण वसुल करत हा सामना अखेर 31-31 असा बरोबरीत राखला. दुसऱ्या एका सामन्यात दबंग दिल्लीने तेलगु टायटन्सचा 41-37 अशा 4 गुणांच्या फरकाने पराभव केला. दबंग दिल्लीतर्फे नवीन कुमारने 15 गुण मिळविले.