जिल्ह्यातील लाडक्या बहिणींना कर्जासाठी लागतील 26 अब्ज

कोल्हापूर / अहिल्या परकाळे :

मुख्यमंत्री लाडकी बहीण योजना बंद तर होणार नाहीच. उलट लाडक्या बहिणींना 40 हजार रुपयांपर्यंत कर्ज दिले जाईल, अशी लोकप्रिय घोषणा उपमुख्यमंत्री आणि अर्थमंत्री अजित पवार यांनी केली आहे. एकट्या कोल्हापूर जिह्याचा विचार करता, 6 लाख 62 हजार 773 लाडक्या बहिणी आहेत. प्रत्येकीला 40 हजार रुपयांचे कर्ज याप्रमाणे तब्बल 26 अब्ज 51 कोटी 9 लाख 20 हजार रुपयांची तरतूद करावी लागणार आहे. मात्र, या कर्ज योजनेची प्रत्यक्ष अंमलबजावणी कधी होणार, याबाबत अद्याप शासनस्तरावर स्पष्टता आलेली नाही.

जिल्ह्यातील 6 लाख 96 हजार 777 महिलांनी लाडकी बहीण योजनेसाठी अर्ज केले होते. त्यापैकी 6 लाख 62 हजार 773 महिलांचे अर्ज मंजूर करण्यात आले तर 34 हजार 4 महिलांचे अर्ज नामंजूर करण्यात आले. त्यामुळे कोल्हापूर जिल्ह्याचा विचार करता करवीर तालुक्यातील सर्वाधिक म्हणजे 1 लाख 49 हजार 682 महिलांचे अर्ज मंजूर करण्यात आले आहेत. त्यापाठोपाठ हातकणगले तालुक्यातील 1 लाख 34 हजार 569 महिलांना लाडकी बहिण योजनेचा लाभ मिळत आहे. तर गगनबावडा तालुक्यातील सर्वाधिक कमी म्हणजे 6 हजार 705 महिला लाभार्थी आहेत. याशिवाय पोर्टलवरील महिलांची संख्या वेगळी आहे.

घोषणेनुसार 40 हजार रुपयांचे भांडवल मिळाले तर लाडक्या बहिणी स्वत:चा व्यवसाय करुन आपल कुटुंब उभं करतील. परंतु शासनाने उपमुख्यमंत्र्यांनी जाहीर केल्याप्रमाणे लवकरात लवकर लाडक्या बहिणींना 40 हजार रूपये कर्ज द्यावे. तसेच कर्ज दिले म्हणून महिना दिला जाणारा 1 हजा 500 रूपयांचा हप्ता सुरूच ठेवावा, अशी मागणी लाडकी बहीण योजनेतील महिलांकडून होत आहे.

महाराष्ट्र शासनाची मुख्यमंत्री माझी लाडकी बहीण योजनेंतर्गत पात्र महिलांना दरमहा दीड हजार रुपये आर्थिक मदत दिली जाते.

• वैशिष्ट्ये

योजनेचे नाव : मुख्यमंत्री माझी लाडकी बहीण योजना

उद्देश : महिलांचे आर्थिक सक्षमीकरण आणि स्वावलंबन

आर्थिक मदत : दरमहा 1,500 रुपये (वर्षाला 18,000 रुपये)

कर्ज योजना : 40,000 रुपये स्वयंरोजगारासाठी

कोल्हापूर जिह्यातील लाभार्थी : 6 लाख 62 हजार 773 महिला

कर्जाची रक्कम : 26 अब्ज 51 कोटी 9 लाख 20 हजार रुपये

जिह्यातील लाडकी बहीण योजनेचा आढावा

जिह्यात मुख्यमंत्री माझी लाडकी बहीण योजनेला प्रचंड प्रतिसाद मिळाला आहे. जिह्यातील एकूण 6 लाख 96 हजार 777 महिलांनी या योजनेसाठी अर्ज केले होते. यापैकी 6 लाख 62 हजार 773 महिलांचे अर्ज मंजूर झाले, तर 34 हजार 4 अर्ज विविध कारणांमुळे नामंजूर करण्यात आले.

• लाभार्थींची आकडेवारी :

करवीर तालुका: 1 लाख 49 हजार 682 महिला (सर्वाधिक)

हातकणंगले तालुका: 1 लाख 34 हजार 569 महिला

गगनबावडा तालुका: 6 हजार 705 महिला (सर्वात कमी)

• अंमलबजावणी व्हावी

लाडकी बहीण योजनेचा हप्ता दर महिन्याला एक ते दहा तारखेच्या आत मिळावा, तसेच 40 हजार रूपये कर्ज देऊन व्यवसाय सुरू करण्यासाठी आर्थिक मदत करावी, यासंदर्भात उपमुख्यमंत्र्यांनी घोषणा केली असली तरी प्रत्यक्ष अंमलबजावणी कधी होणार, यासंदर्भात सरकारकडून स्पष्ट करण्यात आलेले नाही. त्यामुळे उपमुख्यमंत्री अजित पवार यांनी लवकरात लवकर लाडक्या बहिणींना कर्ज द्यावे.

                                                                                                                                             - रूपाली शिकतोडे (लाभार्थी)

• तालुकानिहाय लाडकी बहीण महिलांची अॅपवरील संख्या

तालुका                    आलेले अर्ज               मंजूर अर्ज               नामंजूर अर्ज

कागल                         59452                                 56131                                  3321

शिरोळ                       75557                                   72383                                  3174

शाहूवाडी                    34950                                     32860                                  2090

आजरा                        23876                                   22328                                  1548

हातकणगले                   138262                                 134569                               3693

राधानगरी                       39850                                 37836                                  2014

गडहिंग्लज                     42994                                  39497                                   3497

करवीर                         155827                                 149682                                 6145

भुदरगड                       29161                                      27479                                 1682

पन्हाळा                        52339                                      41160                                 3179

चंदगड                          37300                                    34143                                   3159

गगनबावडा                    7209                                         6705                                       504

एकूण                         696777                                      662773                                   34004