बेळगाव वॉरियर्स,मॅक्स क्लब विजयी

राजू दोड्डण्णावर चषक क्रिकेट स्पर्धा

बेळगाव : आनंद क्रिकेट अकदामी आयोजित राजू दोड्डण्णावर चषक 13 वर्षाखाली आंतर क्लब क्रिकेट स्पर्धेच्या शेवटच्या साखळी सामन्यात बेळगाव वॉरियर्स संघाने लेक व्ह्यू संघाचा 7 गड्यांनी तर मॅक्स क्रिकेट क्लबने दळळी टेंडर्सचा 9 गड्यांनी पराभव करून प्रत्येकी 2 गुण मिळविले. प्रितम रेड्डी व श्लोक चढीचाल यांना सामनावीर पुरस्कार देण्यात आला. भगवान महावीर मैदानावरती खेळविण्यात आलेल्या पहिल्या सामन्यात लेक व्ह्यू संघाने प्रथम फलंदाजी करताना 25 षटकात 8 गडी बाद 95 धावा केल्या. त्यात आराध्य तुडवेकरने 2 चौकारासह 19, आयुष यु. ने 2 चौकारासह 11 धावा केल्या. बेळगाव वॉरियर्सतर्फे श्लोक चडीचालने 10 धावात 3, अल्तमशने 11 धावात 2, आरूषने 19 धावात 2 गडी बाद केले. प्रत्युत्तरादाखल खेळताना बेळगाव वॉरियर्सने 17.1 षटकात 3 गडी बाद 96 धावा करून सामना 7 गड्यांनी जिंकला. त्यात श्लोक चडीचालने 5 चौकारासह 37, वोजस गडकरीने 2 चौकारासह 14 धावा केल्या. लेक व्ह्यूतर्फे आयूष 1 गडी बाद केला. दुसऱ्या समान्यात दळवी ट्रेडर्सने प्रथम फलंदाजी करताना 25 षटकात सर्व गडी बाद 90 धावा केल्या. त्यात महम्मद जियान सलीमवालेने 2 चौकारासह 15 धावा केल्या. मॅक्सतर्फे प्रितम रेड्डीने 9 धावात 3 गडी बाद केल्या. प्रत्युत्तरादाखल खेळताना मॅक्स क्रिकेट क्लबने 17 षटकात 1 गडी बाद 91 धावा करून सामना 9 गड्यांनी जिंकला त्यात श्रवण पाटीलने 2 चौकारासह 34, अवनी 2 चौकारास 20 धावा केल्या. सामन्यानंतर प्रमुख पाहुणे मेहबुब सनदी, विनायक पाटील यांच्या हस्ते सामनावीर श्लोक चडीचाल तर कल्लाप्पा आनंदाचे, विनायक कोलारी यांच्याहस्ते सामनावीर प्रितम रेड्डी यांना चषक देऊन गौरविण्यात आले.