बँकिंग -आयटीच्या विक्रीने बाजार प्रभावीत
सलगच्या तेजीला पूर्णविराम : अंतिम सत्रात सेन्सेक्स-निफ्टी नुकसानीत
वृत्तसंस्था/ मुंबई
चालू आठवड्यातील अंतिम सत्रात शुक्रवारी भारतीय भांडवली बाजारात बँकिंग आणि आयटी क्षेत्रात झालेल्या जोरदार विक्रीमुळे बीएसई सेन्सेक्स आणि एनएसई निफ्टी यांचे निर्देशांक घसरणीसह बंद झाले आहेत. मागील तीन सत्रांपासून सुरु असलेल्या तेजीला शुक्रवारी पूर्ण विराम मिळाला आहे. जागतिक पातळीवरील नकारात्मक संकेतामुळेही भारतीय बाजार काहीसा प्रभावीत राहिला होता.
शुक्रवारी सेन्सेक्स प्रारंभीच्या दरम्यान 485 अंकांनी घसरुन सुरु झाला. मात्र दिवसअखेर सेन्सेक्स 423 अंकांनी प्रभावीत होत 0.55 टक्क्यांसह निर्देशांक 76,619.33 वर बंद झाला. दुसऱ्या बाजूला राष्ट्रीय शेअर बाजाराचा निफ्टी दिवसअखेर 108.60 अंकांच्या नुकसानीसोबत निर्देशांक 23,203.20 वर बंद झाला.
दिग्गज कंपन्यांमधील सेन्सेक्समध्ये 30 कंपन्यांपैकी इन्फोसिस आणि अॅक्सिस बँकेचे समभाग पाच टक्क्यांहून अधिक घसरले. यासह कोटक बँक, टाटा कन्सल्टन्सी सर्व्हिसेस (टीसीएस), एचसीएल टेक, महिंद्रा अँड महिंद्रा, बजाज फायनान्स, बजाज फिनसर्व्ह, इंडसइंड बँक आणि आयसीआयसीआय बँकेचे समभागही घसरले.
अन्य कंपन्यांमध्ये झोमॅटो आणि रिलायन्स इंडस्ट्रीजचे समभाग दोन टक्क्यांहून अधिकने वाढले. यासह नेस्ले इंडिया, एशियन पेंट्स, पॉवरग्रिड, टाटा स्टील, आयटीसी, लार्सन अॅण्ड टुब्रो, सनफार्मा यांचे समभाग तेजीसह बंद झाले.
बाजारात घसरणीची कारणे काय?
- निर्देशांकात मोठे वजन असलेल्या इन्फोसिस, टीसीएस, टेक महिंद्रा आणि एचसीएल टेक सारख्या आयटीच्या समभागांमध्ये झालेल्या मोठ्या विक्रीमुळे शुक्रवारी शेअर बाजार घसरला.
- शुक्रवारी डॉलरच्या तुलनेत भारतीय रुपया 0.07 टक्क्यांनी घसरून 86.61 वर पोहोचला. परदेशी गुंतवणूकदारांनी केलेल्या विक्रीचा फटका सलग 11 व्या आठवड्यात रुपया घसरला.
- परदेशी गुंतवणूकदारांनी केलेल्या सततच्या विक्रीमुळे देशांतर्गत शेअर बाजाराच्या भावनांवर नकारात्मक परिणाम झाला आहे.
- याशिवाय, देशांतर्गत कंपन्यांच्या डिसेंबर तिमाहीच्या निकालांबद्दल चिंता आणि मार्च तिमाहीसाठी खराब आउटलुकमुळे आयटी कंपन्यांमध्ये घसरण झाली.