विदेशी ईटीएफच्या म्युच्युअल फंड गुंतवणुकीवर बंदी
1 एप्रिलपासून नवीन गुंतवणूक करु नका : सेबीकडून निर्देशाची घोषणा
वृत्तसंस्था/ मुंबई
पुढील महिन्यापासून म्हणजे 1 एप्रिल 2024 पासून, विदेशी ईटीएफ म्हणजेच एक्सचेंज ट्रेडेड फंडमध्ये गुंतवणूक करण्यास बंदी असणार आहे. यासंबंधीची माहिती बाजारातील नियामक संस्था सेबीने दिली आहे. जे विदेशी ईटीएफमध्ये पैसे गुंतवतात त्या म्युच्युअल फंड योजनांमध्ये गुंतवणूकदार गुंतवणूक करू शकणार नाहीत. शेअर बाजार नियामक सिक्युरिटीज अँड एक्सचेंज बोर्ड ऑफ इंडिया (सेबी) यांनी म्युच्युअल फंडांना या तारखेपासून नवीन गुंतवणूक करण्यास बंदी घातली आहे.
सेबीचा आदेश
कारण विदेशी ईटीएफमध्ये गुंतवणुकीची कमाल मर्यादा 1 अब्ज डॉलर्स (सुमारे 8,332 कोटी) निश्चित केली आहे. यातील गुंतवणूक आता या मर्यादेच्या जवळपास पोहोचली आहे. याबाबत, सेबीने देशातील म्युच्युअल फंड घराण्यांचे प्रमुख असलेल्या असोसिएशन ऑफ म्युच्युअल फंड्स इन इंडिया (एएमएफआय) या संस्थेलाही पत्र लिहिले आहे.
परदेशात गुंतवणूक करणाऱ्या म्युच्युअल फंडांच्या दोन योजना
- विदेशी शेअर्समध्ये थेट गुंतवणूक:
यामध्ये म्युच्युअल फंड कंपन्या थेट विदेशी शेअर्समध्ये गुंतवणूक करतात. यासाठी 7 अब्ज डॉलर्सची (सुमारे 58,347 कोटी) कमाल मर्यादा निश्चित करण्यात आली आहे. या मर्यादेच्या पुढे गेल्यावर सेबीने त्यात गुंतवणुकीवर बंदी घातली. यापूर्वी जानेवारी 2022 मध्ये गुंतवणुकीची मर्यादा 7 अब्ज डॉलरवर पोहोचली होती. त्यानंतर सेबीने गुंतवणूक थांबवण्यास सांगितले होते. पुन्हा 2023 मध्ये, सेबीने हा आदेश मागे घेतला होता आणि म्हटले होते की जर कोणत्याही म्युच्युअल फंडाची मालमत्ता विदेशी समभागांच्या किमती घसरल्यामुळे घसरली असेल तर ते विदेशी समभागांमध्ये गुंतवणूक करू शकतात.
- फंड ऑफ फंडात गुंतवणूक:
यामध्ये म्युच्युअल फंड विदेशी ईटीएफचे युनिट्स खरेदी करतात. यासाठी 1 अब्ज डॉलर्सची कमाल मर्यादा निश्चित करण्यात आली आहे. सेबीने नुकतेच यामध्ये गुंतवणुकीवर बंदी घालण्याचे आदेश दिले आहेत. एएमएफआय स्वत: देखील वरच्या मर्यादेची काळजी घेते. विदेशात गुंतवणूक करणाऱ्या म्युच्युअल फंड योजना नेहमी गुंतवणुकीची वरची मर्यादा लक्षात ठेवतात. त्यामुळे अनेक वेळा मर्यादा वाढवूनही ते गुंतवणूक करत नाहीत. यापूर्वी, निप्पॉन इंडिया यूएस इक्विटी अपॉर्च्युनिटीज, निप्पॉन इंडिया जपान इक्विटी, निप्पॉन इंडिया तैवान इक्विटी आणि निप्पॉन इंडिया ईटीएफ हाँग-सेंग बीईएस या म्युच्युअल फंडांच्या चार योजनांनी 26 फेब्रुवारी रोजी गुंतवणूक करणे थांबवले होते.