For the best experience, open
https://m.tarunbharat.com
on your mobile browser.

बद्रीनाथहून परतणारे हेलिकॉप्टर जोशीमठजवळ कोसळले; वैमानिकासह सहा जणांचा समावेश, बचावकार्य सुरू

04:00 PM Oct 30, 2026 IST | Tarun Bharat Portal
बद्रीनाथहून परतणारे हेलिकॉप्टर जोशीमठजवळ कोसळले  वैमानिकासह सहा जणांचा समावेश  बचावकार्य सुरू
Advertisement
डेहराडून : उत्तराखंडमधील बद्रीनाथ धाम येथून परतणाऱ्या हेलिकॉप्टरला आज भीषण अपघात झाल्याची घटना समोर आली आहे. चमोली जिल्ह्यातील जोशीमठ परिसरातील चाई गावाजवळ लष्करी छावणीच्या परिसरात हे हेलिकॉप्टर कोसळल्याची माहिती आहे. या हेलिकॉप्टरमध्ये वैमानिकासह सहा जण प्रवास करत होते. घटनेची माहिती मिळताच बचाव पथकांनी घटनास्थळी धाव घेत शोध आणि मदतकार्य सुरू केले.

मिळालेल्या प्राथमिक माहितीनुसार, ट्रान्स भारत कंपनीचे हे हेलिकॉप्टर बद्रीनाथ येथून डेहराडूनमधील सहस्रधारा येथे जात होते. प्रवासादरम्यान हेलिकॉप्टरचा संपर्क तुटला. त्यानंतर त्याचे संभाव्य ठिकाण जोशीमठमधील चाई गावाच्या वर असलेल्या लष्करी छावणीच्या परिसरात असल्याचे समोर आले. हेलिकॉप्टरमध्ये पाच प्रवासी आणि एक वैमानिक असे एकूण सहा जण होते.

Advertisement

बचाव पथकांकडून युद्धपातळीवर प्रयत्न

हेलिकॉप्टर अपघाताची माहिती मिळताच राज्य आपत्ती प्रतिसाद दल (SDRF), जिल्हा प्रशासन आणि भारत-तिबेट सीमा पोलीस (ITBP) यांच्या पथकांनी घटनास्थळाकडे रवाना होत बचावकार्य हाती घेतले. दुर्गम आणि डोंगराळ भाग असल्याने मदतकार्यादरम्यान अडचणी येण्याची शक्यता आहे. हेलिकॉप्टरमधील प्रवाशांची स्थिती आणि त्यांच्या सुरक्षिततेबाबत अधिकृत माहिती मिळण्याची प्रतीक्षा आहे.

मुख्यमंत्री धामी यांचे परिस्थितीवर लक्ष

या दुर्घटनेची माहिती मिळाल्यानंतर उत्तराखंडचे मुख्यमंत्री पुष्कर सिंह धामी यांनी दुःख व्यक्त केले. प्रशासन आणि बचाव पथकांना आवश्यक त्या सूचना देण्यात आल्याचे त्यांनी सांगितले. जखमी आढळल्यास त्यांना तातडीने एअरलिफ्ट करून उत्तम वैद्यकीय उपचार उपलब्ध करून देण्याचे निर्देशही देण्यात आले आहेत. संपूर्ण बचावकार्यावर आपण लक्ष ठेवून असल्याचे मुख्यमंत्र्यांनी स्पष्ट केले.

Advertisement

खराब हवामानामुळे उड्डाणासमोर आव्हान

दरम्यान, उत्तराखंडच्या डोंगराळ भागात सध्या हवामान प्रतिकूल आहे. भारतीय हवामान विभागाने ३० ऑक्टोबरसाठी चमोलीसह नैनीताल, चंपावत, पिथौरागढ आणि बागेश्वर जिल्ह्यांत ऑरेंज अलर्ट जारी केला होता. काही भागांत वादळी वारे, विजांचा कडकडाट आणि गारपिटीसह पावसाची शक्यता वर्तवण्यात आली होती.

या प्रतिकूल हवामानाचा हेलिकॉप्टरच्या उड्डाणावर परिणाम झाला असण्याची शक्यता व्यक्त केली जात आहे. मात्र, अपघाताचे नेमके कारण अद्याप स्पष्ट झालेले नाही. बचावकार्य पूर्ण झाल्यानंतर आणि संबंधित यंत्रणांच्या तपासानंतरच दुर्घटनेमागील कारण समोर येणार आहे.

Advertisement
Tags :

.