वाहन कंपन्यांचे समभाग 10-15 टक्क्यांपर्यंत घसरण्याची शक्यता

सीएलएसएचा इशारा : मध्यपूर्वेतील तणाव

वृत्तसंस्था/ नवी दिल्ली

मध्यपूर्वेतील सध्याच्या तणावाचा ऑटो क्षेत्राच्या शेअर्सवर नकारात्मक परिणाम झाला आहे. सीएलएसएच्या मते, काही प्रमुख चिंतांमुळे ऑटो स्टॉक्स घसरत आहेत. आकडेवारीनुसार, मार्च 2026 मध्ये आतापर्यंत निफ्टी ऑटो इंडेक्स जवळपास 13 टक्क्यांनी घसरला आहे, जी एकूण बाजारापेक्षा मोठी घसरण आहे, जिथे याच कालावधीत निफ्टी 50 जवळपास 9 टक्क्यांनी प्रभावीत झाला आहे. मध्यपूर्वेतील संकटामुळे पुरवठा साखळीतील समस्यांमुळे उत्पादनावर परिणाम होण्याची शक्यता आहे. तसेच, जागतिक तणावामुळे कच्च्या मालाच्या किमती झपाट्याने वाढत आहेत, ज्यामुळे खर्च वाढत असल्याचे दिसले आहे.

ऑटो स्टॉक्समध्ये 15 टक्केपर्यंत घसरण अपेक्षित

ब्रोकरेज फर्मने 2020 मधील कोविड-19 च्या पहिल्या लाटेदरम्यानच्या घटनांचे विश्लेषण केले, जेव्हा कमी मागणी आणि उत्पादन समस्यांच्या चिंतेमुळे ऑटो स्टॉक्स 30 टक्के  ते 45 टक्क्यांनी घसरले होते.  ब्रोकरेज फर्मने म्हटले आहे की सध्याच्या परिस्थितीत ऑटो स्टॉक्समध्ये सुमारे 15 टक्केपर्यंत  घसरण होऊ शकते. यामध्ये अशोक लेलँड, बजाज ऑटो, आयशर, हिरो मोटोकॉर्प, ह्युंदाई मोटर इंडिया, महिंद्रा अँड महिंद्रा, मारुती सुझुकी यासह इतरांचा समावेश आहे.